Двојната формула сé уште е во игра, но во различна варијанта
Кој им дал право на оваа генерација граѓани со референдум да прифаќаат друго име, кога генерации претходно го одржале името Македонија?
Ми беше драго што Иванов ме покани да му бидам советник. Му ветив целосна поддршка и помош, иако тоа ќе биде повеќе лично и волонтерски, отколку професионално. Вака Димитар Мирчев ја објаснува својата нова позиција советник на претседателот. Докторот по политички науки, сега актуелен декан на ФОН, во својата кариера бил и амбасадор во Ватикан и во Словенија. Сé почесто спомнуваното име „Северна Македонија“, според него, не е добро решение.
- Тоа и сличните варијанти како Горна, Вардарска, Централна... се поврзани со идентитетот на нашата нација, а за тоа никој не може да прави компромиси - оценува Мирчев.
Врз основа на засилената агенда на средби на државно-владиниот врв се појавија и гласини дека проблемот со името веќе е во завршна фаза. Далеку ли е решението на спорот со Грција?
- Воопшто не верувам дека решавањето на спорот за името со Грција е во завршна фаза. Има совети, сугестии, поттикнувања на двете страни за што побрзо да се реши спорот, но навистина нема некој голем притисок. Би требало нашите стратегиски партнери и пријатели, Европската Унија, САД и други, повеќе во таа смисла да и се обраќаат на Грција, отколку нам. Доколку Грција го прифати условот за признавање на нашиот национален идентитет, веројатно е дека работите ќе се решаваат значително побрзо.
„Северна Македонија“ е името со кое најчесто се шпекулира. Како тоа би се одразило понатаму врз државата?
- Се разбира сметам дека не е добро решение. Лошо се одразува дури и на расправата за тоа дали е прифатливо или не. Тоа и слични варијанти (Горна, Вардарска, Централна итн.) се непосредно во врска со идентитетот на нашата нација и на таа точка веќе никој кај нас не може да прави компромиси. На пример, може да се случи Владата или премиерот да прифатат такво име и потоа да се оди на референдум и народот да го прифати тоа. Но кој им дал право на оваа генерација граѓани на Македонија со референдум да прифаќаат какво и да е друго име, кога генерации и генерации пред тоа го одржале името Македонија. Доколку би се согласиле со такво решение, а не ја исклучувам таа варијанта, мислам дека навистина ќе покажеме дека не го заслужуваме името Македонија. Но, реално гледајќи, до компромис вистина треба да се дојде. За нас е многу посуштински, од компромисот за името, апсолутно да се опстои на националниот идентитет, јазик, култура, историја.
Двојната формула не е веќе во игра. Ова го порача новиот претседател Иванов, чиј советник сте Вие. Ако не е двојната формула, што, според Вас, би било добро решение на спорот?
- Двојната формула сé уште е во игра, но во една поинаква варијанта. Сега и Грците ја прифаќаат, но во сосема поинаква формула: внатре да се викаме како сакаме, а во меѓународната заедница според нивниот вкус. Инаку, без разлика на варијантата на двојната формула, таа во меѓународниот и внатрешниот живот кај нас ќе предизвика исклучителни и нерешливи правни и други проблеми. Двојната формула е едновремено и најлесно и најтешко решение.
Претставници на САД неколку пати повторија дека се преговара само за името. И вие изјавувате дека не треба да се преговара за јазикот, културата и нацијата. Зошто Вашингтон, според вас, сега го повторува ова?
- Мислам дека не само САД, туку и претставниците на ЕУ и на другите големи земји, без разлика дали се наши партнери или не, веќе сериозно сфаќаат дека на една земја не може да и се наметнат име, идентитет, поинакви етно-национални чувства и слично. Токму спротивно, сето тоа може да има и спротивен ефект. На пример, признавањето на нашето уставно име од страна на САД во 2004 година изврши позитивно влијание не само во јакнењето на меѓународната позиција на Македонија туку и во релаксирањето на односите во регионот. Доколку денес некој инсистира да се преговара за идентитетот, националноста, јазикот, тоа ќе значи да се отфрли, игнорира, обезвредни цел еден народ, нација, национална држава. Ниту САД ниту другите не се подготвени да одат во такви негации и оспорувања на човековите па и етнички права, на самоопределбата на народите. Замислете една ситуација... во извештаите на американскиот конгрес или на Стејт департментот се зборува на големо за правата на Македонците во Грција, а на крајот би можело да испадне дека нема такви Македонци ниту во Македонија.
Celoto intervju:
http://www.novamakedonija.com.mk/NewsDetal.asp?vest=68942540208&id=9&prilog=0&setIzdanie=21706
