Владата на Никола Груевски веќе трета година по ред спроведува смислено сценарио за антиквизација на своето политичко делување.
Очигледно замислувајќи се како Александар Македонски и злоупотребувајќи ја историјата Никола Груевски свесно ја изолира Македонија од ЕУ и НАТО.
На тој начин сака да ја дефокусира јавноста од економската криза, растечката невработеност и огромните проблеми истовремено нарушувајќи го угледот на државата во странство.
Дополнително, Никола Груевски повторно во неговиот познат манир “не сум од овде” се обидува да ја замајува јавноста дека проектот за антиквизација на неговто политичкото делување не е негово сценарио.
Затоа, денес ја потсетуваме јавноста на следните факти:
Број 1, Никола Груевски го преименува скопскиот аеродром во Александар Велики,
Број 2, Никола Груевски го именуваше Коридорот 10 како Александар Македонски,
Број 3, Никола Груевски го преименува Градскиот Стадион во Скопје во Филип Втори Македонски,
Број 4, Никола Груевски во 2008 година и одобри 8,6 милиони евра на Општината Центар за споменици, наместо парите да им ги даде на фирмите,
Број 5, Никола Груевски според информациите на медиумите нарачал споменик на Александар Македонски од 35 метри кој ќе го постави на градскиот плоштад паралелно со неговата црква, кој ако е облеан во бронза во Италија, заедно со транспортот, поставувањето и изведбената награда ќе ги чини граѓаните повеќе од сите останати споменици заедно,
Број 6, Никола Груевски не ја говори вистината кога тврди дека поставува само еден споменик на Александар Македонски затоа што претходно веќе постави два други во Прилеп и Штип.
Сметаме дека е крајно време Груевски и ВМРО ДПМНЕ да престанат со своите неодговорни и ирационални политики да ја туркаат Македонија во тешка изолација. На сите ни е јасно дека не е можен економски развој, странски инвестиции и нови работни места без брза интеграција на Македонија.
Владата мора веднаш да го смени својот курс во надворешната политика за да ги зајакне позициите на Македонија. Логичен чекор би бил јавното прифаќање на предлозите на меѓународните институции и влијателни невладини организации како добра почетна основа за враќање на Македонија на патеката на ЕУ и НАТО интеграциите.
