ДРЖАВАТА СЕ ВКЛУЧУВА ВО "УБЕДУВАЊЕТО" НА СУПЕРТАЛЕНТОТ ОД ИНТЕР
И Владата во "акција" по Славковски
Премиерот на Република Македонија, Владо Бучковски, се вклучи во акцијата за "убедување" на можеби најголемиот европски талент, 17-годишниот Македонец со шведски пасош, Горан Славковски, да прифати настап во македонската репрезентација.
Вчера од Кабинетот на претседателот на Владата ни беше потврдено дека се воспоставени контакти со Славковски, неговото семејство и неговиот менаџер. На овој чекор Бучковски, кој е голем љубител на фудбалот и спортот воопшто, се одлучил по препорака на своите советници а откако целиот "случај" со "чудото од дете" кулминираше по неговото деби за првиот тим на Интер.
Славковски има двојно државјанство, македонско и шведско. Деновиве, според најавите, конечно се очекува одлуката на која национална селекција ќе и се приклучи.