Благодарам за контактите од Жане. Потполно се согласувам со твоето мислење за неа. Инаку, Жане лично ја познавам уште од времето кога немаше три мобилни, туку само еден фиксен телефон обвиткан со слоеви селотејп како последица од деноноќните повици за помош. Уште тогаш Жане ми остави впечаток на стабилна и сериозна личност со исцрпни познавања на материјата и длабока емпатија за човечките страдања. За оние кои не ја познаваат, Жане е излезена од катедрата на далеку попрочуената госпожа Лепа од Драчево, која пак има специјализирано во Визбегово, кај доајенот на македонското гатање и јасновидност, госпожа Везирка. Се сеќавам дека Жане, уште како гатач-приправник имаше совршен однос со клиентите, многу темелна дијагностика и ултра-прецизна јасновидост. Уште неседнат, рутинирано ми ја погоди возраста и името (иако бев маскиран со капа и темни наочари), ми го погоди (и тоа во обратен редослед) матичниот број, како и имињата (и надимаците!) на моите комшии на двата спрата под мене. Тогаш не носев слика од особата за која барав мислење, ама се погоди да носам рентген снимка и крвна слика пошто се враќав од Државна. Жане не само што ѝ го погоди името и дијагнозата (имаше скршеница како последица од удес), туку до децимала го погоди бројот на леукоцити, еритроцити, липиди, како и нивото на прогестерон. Жената што стоеше зад мене, стаписана од ваквото ниво на прецизност, ја испушти живата кокошка од раце и кокошката го скрши вратот на прагот од чекалната. Мислам дека ова доволно зборува за каков голем талент станува збор.
