„Концепт за умирање/Живот без една боја“ е насловена новата книга на Венко Андоновски, која со поддршка на Министерството за култура треба да се појави годинава во издание на издавачката куќа „Табернакул“. Љубопитството кога е овој македонски писател во прашање секогаш расте со секоја најава за нешто ново од неговото перо, зашто тој е најчитаниот домашен автор. Особено ако тоа е најава за роман, како еден од најатрактивните книжевни жанрови. И уште повеќе ако се поминати речиси четири години од неговиот последен роман „Вештица“.
- Да, станува збор за роман. Тоа е роман што го пишувам подолго време. Не сум сигурен уште за насловот, па затоа во програмата го предложив под два наслови - потврдува Андоновски.
Според него, станува збор за љубовен роман.
- Онаму каде што застана „Вештица“ продолжува приказната во новиот роман. А темата може да се сублимира во прашањето: „Може ли во љубовта да се сретнат луѓе кои живееле во различни времиња?“, а се темели на тоа дека љубовта е вечна, безвремена - вели Андоновски.
Неговиот нов роман веројатно ќе го заскокотка секој љубопитен читател. Романот бара активен, а не пасивен читател, бидејќи е неопходна активна улога на читателот при читањето на делото.
- Романот ќе има доста крими-елементи, а читателот ќе мора сам да ја состави приказната. Значи, тоа е една сложена композиција во која и читателот ќе биде вклучен. Поради тоа мислам дека ќе биде интересен за публиката - вели Андоновски.
И во претходниот роман „Вештица“, чие продолжение е „Концепт за умирање/Живот без една боја“, дејството се случува и во средниот век и во денешно време, но, овде Андоновски создава нов образец, „отворено“ дело, во кое читателот е некој вид коавтор. Меѓутоа, романот најмногу освојува со виртуозниот стил, со перфекцијата во раскажувањето на двете приказни – приказната за спалувањето на жените во средниот век и современата љубовна приказна.
Андоновски сé уште работи на новата книга и најавува дека таа ќе се појави на есен.
- Цело лето ќе работам, а романот би требало да биде објавен некаде во октомври или ноември - најавува Андоновски.
Романот ќе го објави издавачката куќа „Табернакул“, а не „Култура“ чиј ексклузивен автор беше Андоновски.
- Немаше повеќе елементи за соработка со „Култура“. Сега го сменив издавачот и тоа е „Табернакул“ - вели тој.
Издавачката куќа „Табернакул“ кон крајот на минатата година ги реиздаде и неговите два претходни романи „Папокот на светот“ и „Вештица“, отпечатувајќи ги како несекојдневно и пријатно изненадување во пресрет на новогодишните и божиќни празници. Со овој потег, македонскиот читател го доби десеттото издание на романот „Папокот на светот“, кој има повеќе од десет илјади продадени примероци и петтото издание на романот „Вештица“, продаден во повеќе од четири илјади примероци.
Романот „Папокот на светот“ во 2001 година беше овенчан со наградите „Стале Попов“ и стана Роман на годината на „Утрински весник“. „Папокот...“ ја доби и „Балканика“ - награда за најдобра книга на Балканот. Според овој роман е направена и театарска претстава во режија на Златко Славенски, а послужи и како појдовна основа за сценариото на филмот „Превртено“, во режија на Игор Иванов.
За романот „Вештица“, пак, најдобрата препорака дојде од Петре М. Андреевски, маестрото на македонската уметничка проза, кој за ова дело, непосредно пред својата смрт, напиша: „По завршувањето на некои мои книги, многупати сум останувал рамнодушен, мислејќи дека некој друг ги напишал. За романот ‘Вештица’, пак, многу повеќе се радував отколку јас да сум го напишал“.
Во книжарницата на „Табернакул“, „Папокот на светот“ и „Вештица“ на љубителите на добрата книга, им се достапни со намалена цена од 20 проценти.
Се распродаваше милион пати. Ама тоа секако не значи дека е неквалитетна литература. Ако ти се допаднал Папокот, потруди се, и земи си ја, нема да се разочараш.
