Имам доста да пишувам на темава, но ќе гледам да опфатам најкратко што можам сите етапи.
Прво битно е да напоменам дека многу беше тешко да се има било каков контакт со музиката, поради неколку причини: немавме кола, а со тоа ни радио, радио дома немавме, немавме интернет ниту кабловска, така да за да дознаам некоја песна требаше да ја даваат на некој македонски канал во било каква форма (најавна шпица на серија, музички фестивал). До овој момент јас бев тотален дудук, ги знаев тие евровизиските што беа актуелни тоа време (Руслана Wild Dances, турчинот Shake, Гркинката You are the one...) и Тоше актуелните...
Работите се подобрија со излегување на телефоните Сони Ериксон со Блутут и Инфраред, како и со појава на еден музички канал К 15 Music што вртеше постојано македонски песни, мислам дека и на Скајнет (се сеќава ли некој на каналиве воопшто?) пуштаа често македонска музика. Тогаш беше многу интересно време, каде што кружеа исти песни по телефони најчесто со грешни имиња и сите слушавме иста музика во опкружувањето (таа што ја имавме), ако некоj имаше нови песни од некој братучед - сите имавме нови песни. Тогаш мемориите на телефоните беа премали, па ако некој имаше мемориска од 64/128/256 мега, тој беше на бел коњ, не мораше да брише песни. Тука ми беа првите допири со рапот, на телефон се праќаа песни со погрешни имиња: Рнс - Ме мрзи (оригинал: Црногорско поткровје), Тони Зен - Кој сум јас (Интелет), Рнс - Заебанција на телефон (Жешка линија) итн. Паралелно се појави и бран спотови од рап песни кои одеа по тв (на К15 Music): Синди - Ех синди, Легијата - Бонус трака, Тони Зен - Скопје е мој град... И исто така да напоменам дека се мешаа некои песни од крајност во крајност, тотално нелогично како покорно сме си слушале се ова од денешна перспектива, па освен овие песни во телефон имав и Avril - Hot и пази сега Tryambaka - Safi Baraka. За чудо шабанарија апсолутно никаква немав, само знаев дека постои некој човек Цеца што се вика и дека има цицки, ниту Београд ниту ништо, изолиран од се бев.
Доаѓа време на интернет, при крај на основно сум и веќе тука телефоните имаа поголеми мемориски и јас имав можност да навлезам подлабоко. Од македонски рап веќе имав папки со по 100+ песни, екс ју навлегов на големи врати поради едно цд од Парни Ваљак, но и поради Operacija Triumf, подоцна и Македонски Идол, па таму дознавав добри мејнстрим екс ју поп/рок песни. Дојде периодот средно обазование, каде што се дружев со едно дете што слушаше рок и метал, па прати некои песни и после како дознавав бенд она досадното го правев “А овие ги поштуваш ли“. Одамна не се дружам со детето, но тој период заслушав групи како Бон Џови, ГНР, Дип Парпл, Лед Зепелин... Паралелно се тргнав малку од мејнстрим рокот, почнаа омилени (и до ден денес се истите) да ми стануваат изведувачи како Индекси, Миладин Шобиќ, Душан Прелевиќ... Земав да одам на сите можни концерти и станав човек што секој музички жанр го слуша. Не секој поджанр (тоа е невозможно), но во секој жанр имам пуштено по некое коренче.
Успат се вратив на корените, од Аврил таа Хот што ја имав во телефон (не знам дал ја праќале дека мислеле хот слика од Аврил е), ми стана преглупа песна, но првиот нејзин албум Let Go ми е врв и ми е драг до ден денес. Станав мекуш па не слушам Сафи Барака или било што псај, ама одвреме знам да пуштам нешто електронско комерцијално ко Тиесто или нешто транс со женски вокал. Навлегов и со symphonic, power metal со Within Temptation, Sonata Arctica, си поштувам до ден денес Iron Maiden. И панк си почнав паралелно главно Perkele и Cock Sparrer. Апсолутно се што е носталгично и не е во тренд си слушам, како Ѓорѓи Крстевски, а се што е актуелно игнорирам и сум паднат од Марс кога некој ќе ми збори за Лидии на ЈангДади. А да за жал, навлезе тоа турбофолкот во мене на голема врата против моја желба. Но и тоа се сепак некои песни таму Марина Туцаковиќ што ги пушувала, што пак имаат некаква смисла и можам да најдам нзс со нив. Денешните песни Бресквици, Нучи тие за среќа сум ги избегнал и не можам конекција никако со нив да етаблирам и покрај форсирањето во мојата околина.
