Здраво колеги инвеститори, сакав да придонесам на дискусијата со една базична споредба на валуациите на банките во поширокиот регион. Најмногу ме интересираше да видам како водечките 3 македонски банки се вреднувани во однос на другите банки во регионот.
Споредбата се базира на односот на профитабилноста на банката (дефинирана преку ROE – Return on Equity) и цената по која банката е вреднувана P/TBV (Price/Tangible Book Value т.е. цена/книговодствена или “book” вредност).
Ќе се обидам накратко да ги објаснам двата поими за помалку искусните членови.
Индикатор кој генерално најдобро ја одразува профитабилноста на една банка е повратот на капитал (ROE), т.е. остварениот профит во една година во однос на капиталот на банката. Грубо кажано, колку повисок поврат на капиталот банката прави, толку e попрофитабилна т.е. прави повисок принос на капиталот што го поседува. Она што е особено важно е банката да прави поврат на капиталот кој е повисок од нејзината цена на капиталот Cost of Equity (COE) – во спротивно, иако банката може номинално да остварува позитивен резултат и профит, всушност го намалува капиталот на акционерите.
COE се проценува на неколку начини и докаде варира од банка до банка (но грубо како rule of thumb може да сметаме дека COE е околу 10%. На пример за МК банки аналитичарите сметаат COE од 11,6% - т.е. risk free rate за МК од 5%, плус market risk premium 6% по beta од 1.1).
Колку што банката прави повисок ROE (односно ROE над нејзиниот COE), толку во принцип би требало да биде повисоко вреднувана т.е. да биде “поскапа”. Теоретски, во совршено ефикасен пазар, доколку ROE на банката е еднаков на нејзиниот COE, тоа значи дека таа не прави дополнителен принос на капиталот и тогаш банката би требало да е вреднувана еднакво на капиталот што го има т.е. цената по акција ќе биде еднаква на книговодствената вредност по акција (P/TBV = 1), каде книговодствената вредност по акција се добива кога капиталот на банката ќе го поделиме со бројот на акции.
Значи во принцип, банките со повисок ROE заслужуваат и повисок P/TBV. Доколку банката има низок ROE а висок P/TBV, тоа може да биде знак дека е преценета, и обратно, доколку банката има висок ROE а низок P/TBV, тоа може да биде знак дека е потценета.
На графиконот подолу, хоризонталната оска го претставува ROE (колку повеќе на десно е банката, толку е “профитабилна”), а вертикалната оска ја претставува цената на акцијата во однос на книговодствената “book” вредност (колку повисоко е банката, толку е “поскапа”).
Во идеален случај бараме банка со ниска валуација и висока профитабилност.
Прегледај го приврзокот 355086
Да ги видиме сега валуациите на повеќе банки во централна европа и балканот. Во првиот графикон го гледаме ROE за последните 12 месеци (trailing twelve months), заклучно со Q3 2022.
Прегледај го приврзокот 355087
Во однос на МК банките, се гледа дека сите 3 водечки банки остваруваат доста висок ROE. При тоа, во однос на валуацијата, ТНБ и СТБ се блиску до тренд линијата (испрекинатата сина линија) т.е. до некоја фер валуација во однос на просекот на банките во регионот, додека КМБ донекаде отскокнува и е најскапо вреднувана банка на листата (фер валуацијата за КМБ би била поблиску до нивото на ТНБ т.е. околу 1.3 x TBV, наместо моменталните 1,73).
Полските банки генерално делуваат скапо во однос на нивото на профитабилност.
Како најпотценети банки на листата се појавуваат NLB Словенија и австриската Raiffeisen (која заради изложеноста кон Русија, оваа година се тргува по многу ниска цена). Па така, за НЛБ Словенија да ја достигне фер вредноста во однос на другите банки во регионот, базирано на тековниот ROE, би требало да се тргува на двојно повисока цена т.е. околу 1.1 x TBV.
Но за НЛБ Словенија на пример знаеме дека оваа година имаат еднократен boost на профитот (заради преземањето на Zberbank во Словенија по многу поволна цена после руската инвазија на Украина). Затоа сметаме дека е подобро да земеме подолгорочна мерка за профитабилноста со што би ги “испеглале” еднократните варијации во профитот во една дадена година. На следната табела е моменталната цена на банките во однос на нивниот просечен ROE за последните 5 години (2017-2021).
Прегледај го приврзокот 355089
Повторно, гледаме дека трите МК банки имаат конзистентно висока профитабилност (ТНБ е втора на листата со одличен просечен ROE од преку 18%, само зад романската Банка Трансилванија). При тоа ТНБ и СТБ се фер вреднувани во однос на другите банки во регионот, додека КМБ е повторно релативно “поскапа” (пред се заради доста понискиот ROE во 2017 и моментално високиот P/TBV).
НЛБ Словенија се уште личи доста потценето и би требало да се тргува по двојно повисока цена за да достигне фер вредност, а и унгарската OTP и литванската Siauliu Bank, изгледаат поволно. Бугарската First Investment bank, се тргува на само 0.2 x TBV, што е многу ниска цена во однос на прикажаната профитабилност во изминатите години и би било добро понатаму да се испита причината за ова.
Секако, ова е доста поедноставена анализа, како прв чекор за понатамошна подетална анализа. Инаку во валуацијата на вредноста и потенцијалот на една банка би требало да се земат во предвид и многу други фактори како трендот на раст на приходите и профитот, нивото на адекватност на капиталот, ефикасноста во работењето (т.е. cost to income ratio, каде македонските банки инаку стојат одлично), квалитетот и ризичноста на кредитното портфолио, изворите на капитал, итн.
Со оглед на тоа дека банките се едни од најмногу тргуваните акции на МСЕ се надевам дека успеав да придонесам во дискусијата со оваа базична регионална перспектива. Доколку поискусните колеги колеги на форумот имаат да додадат свое мислење на темата вреднување и квалитет на банките во МК и пошироко, тоа би било супер за да го збогатиме колективното знаење.
.
