Според непотврдени информации на Либертас, министерот за финансии ги пакува куферите и си заминува од Македонија.
Кумот на премиерот Груевски, Зоран Ставрески бил решен да ја напушти Владата и да си даде оставка на функцијата која ја извршува веќе шеста година.
Иако важи за креатор на економските политики на Владата, Ставрески, наводно, од Кабинетот на Илинденска бр.2 ќе се пресели во зградата на улицата Х-1818 во Вашингтон.
Светската Банка е дестинацијата на која е упатен македонскиот министер за финансии.
Нема прецизни информации кои се причините.
Иако во кулоарите се шпекулира дека Ставрески при повлекувањето ќе оперира со семејни, односно лични причини, сепак многумина сметаат дека како повод би можеле да се земат предвид „идеолошки“ недоразбирања со вицепремиерот Пешевски и со премиерот Груевски или кулминација на неговиот интерен конфликт со директорот на УБК, Сашо Мијалков, со кого никогаш не биле во „љубов“.
Ставрески веќе има работено во Светска Банка.
По поразот на ВМРО-ДПМНЕ во 2002-та замина за Вашингтон од каде се врати во 2006-та година, кога партијата на Груевски победи на парламентарните избори.
Ставрески во северозападен Вашингтон, во Чеви Чејс има апартман од 90 м2.