Неверојатна новинарска приказна за земјотресот од 1963
Петок, 27 Јули 2012 11:15
Споделете ја веста со Вашите пријатели
Изложбата „Првиот новинарски извештај од разурнатото Скопје од 26 Јули 1963", што вчера вечер беше отворена во Музејот на Град Скопје, авторката Зоја Богдановска и нејзиниот соработник Стоиле Трајковски ја посветиле на Јован Поповски, хроничарот и сонувачот на Скопје.
Изложбата ја отвори градоначалникот на Град Скопје, Коце Трајановски, со што и официјално заврши одбележувањето на 49 годишнината од катастрофалниот земјотрес што се случи на 26-ти јули 1963 година во Скопје.
-За само еден час, новинарот Јован Поповски, во тоа време дописник од Македонија на весникот „Политика“, направи своевиден подвиг, качувајќи се на електричен столб, го испрати во етер првиот и единствен извештај тоа утро од разорениот град. Затоа и денес, 49 години потоа, овде во Музејот на град Скопје, кој е нем споменик на тоа време, се навраќаме на неговиот подвиг и на тој настан којшто е врежан во историјата на нашиот град. Веднаш откако веста за оваа катастрофата го обиколи светот, меѓународната заедница покрена огромна акција за помош, во размери скоро невидени дотогаш. Се врати оптимизмот и надежта на овој град, а собраниот и обединет свет, со неизмерна верба и љубов, помогна во градењето на новото Скопје, кое стана симбол на човековата пожртвуваност, хуманост и солидарност. На бреговите на Вардар израсна нов, современ, убав град во кој, секоја генерација остава свои неимарски траги и белези со кои таа се препознава и идентификува. И во оваа пригода, му се заблагодаруваме на новинарот, писателот и публицист Јован Поповски за неговиот храбар и професионален чин којшто го направи за своите сограѓани и за својот град, истакна градоначалникот Трајановски.
Директорката на Музејот на град Скопје, Љубица Кондијанова, им посака добредојде на присутните во како што рече таа „симболот на разурнатото Скопје“ и замоли за едноминутно молчење во знак на почит на загинатите во катастрофалниот земјотрес во Скопје, а актерот Роберт Вељановски го прочита во целост извештајот што утрото на 26.07.1963-та го испрати Јован Поповски.
Изложбата „Првиот новинарски извештај од разурнатото Скопје од 26 јули 1963" е приказна за првиот новинарски извештај испратен од Скопје утрото на 26 јули 1963 година, кога силнен земјотрес го разурна градот. Во хаотичното утро кога градот останал без сите можни врски со светот, новинарот Јован Поповски, околу 6 часот и 30 минути го испраќа првиот и единствен новинарски извештај испратен тоа утро од разурнатиот град.
Врската била воспоставена од една телефонска бандера крај кејот на Вардар, во близина на Споменикот на паднатите борци во НОБ. Извештајот бил испратен до белградскиот весник „Политика" за кој Јован Поповски работел како надворешен дописник од Скопје и бил објавен истиот ден, околу пладне, во вонредниот број на „Политика". Истата вест ја пренеле и светските медиуми. На тој начин светот разбрал за катастрофалниот земјотрес, и со тоа Скопје почна да ги прима првите спасувачи.
Изложбата, покрај тоа што ни ги раскажува првите часови по катастрофата, е збогатена и со лични предмети на новинарот Јован Поповски преку кои го запознаваме неговото новинарско и публицистичко творештво. Во витрините се изложени неговите награди и признанија, како признанието коешто ретко кој успева да го добие - Плакета за најдолг новинарски стаж.
http://kurir.mk/makedonija/vesti/79335-Neverojatna-novinarska-prikazna-za-zemjotresot-od-1963
