Ефремов со скинати спринтерки на лондонскиот тартан
Атлетскиот претставник на Македонија во машка конкуренција, бидејќи не е стипендист на АМС, а не е ни на листата со десетте потенцијални учесници на Олимпијадата, не добива финансиска помош од државата
На пеколното сонце, во термин кога лекарите препорачуваат мирување, младиот велешанец Kристијан Ефремов на Градскиот стадион во Велес засилено тренира за своето учество на Олимпијадата во Лондон. Ќе трча на патеката од 400 метри. Оваа можност ја доби со вајлд-карта што ја додели организаторот за двајца македонски атлетичари. Така Ефремов ќе биде дел од скромната македонска екипа со четворица учесници, по двајца пливачи и атлетичари.
- Ветувам дека нема да разочарам. Ќе го дадам својот максимум во Лондон за да го остварам мојот најдобар резултат. На 9 јуни на силен меѓународен митинг во Софија значително го подобрив моето најдобро остварување на 400 метри, кое сега изнесува 48,26 секунди, што претставува најдобар резултат во македонската атлетика во последните неколку години. Ова укажува дека сум во солидна форма и ќе ја претставам Македонија во најдобро светло - вели Kристијан Ефремов, член на АK Перпетуум мобиле од Скопје. Тој првите атлетски чекори ги почна токму на овој стадион, каде што сега тренира двапати, по два часа, на ден. Терминот кога работи со тренерот Ѓорѓи Вучков не е тој што тие го сакаа, туку тогаш кога нема рекреативци. Поради големиот број велешани кои трчаат за своја душа, Ефремов не може да работи по 19 часот кога е посвежо, туку два часа порано, по врелиот воздух. Kога почнале, имале проблем Ефремов да истрча еден круг од многубројните рекреативци по патеката. Згора на тоа тартан-патеката изградена 1978 година сега е сериозно оштетена, со огромни дупки каде што се гледа бетонот, па Ефремов ризикува да се повреди и Олимпијадата да му остане неостварен сон. Неговиот тренер Вучков вели дека колку вложуваме во атлетиката, толку добиваме.
- Не можеме да очекуваме ниту Балкански резултати со една патека во Охрид и оваа скоро пропадната во Велес. Очекувам дека Kристијан во Лондон на ОИ ќе остави зад себе според резултатите 3-4 атлетичари. По настапот на ЕП во Хелсинки имаше реакции на неговиот резултат, дека бил под најдоброто време. Јавноста треба да знае, во Хелсинки само еден од 37 атлетичари истрча во претпладневните квалификации, подобро време од неговото најдобро. Биоритамот на атлетичарите не е адаптиран за претпладневни трки. Наша цел е на Олимпијадата да не биде последен и да истрча најдобро што може - вели Ѓорѓи Вучков, тренер на Ефремов.
Атлетичарот Ефремов во Лондон ќе трча со искинати спринтерки, оти двата пара што ги има се со дупки. Бидејќи, не е стипендист на Агенцијата за млади и спорт, ниту беше на листата на десетте потенцијални учесници на Олимпијадата во Лондон, Ефремов не добива финансиска помош од државата. Се финансира сам со помош од неговите родители. Дури и потребните средства за витамини ги обезбедува самиот.
- Со оглед на минималните услови што ги имам и тоа што не примам никаква спортска стипендија, задоволен сум од сегашната форма. Од олимписката Б-норма ме делат 2,36 секунди, па со соодветни подготовки и финансиски средства, очекувам на следната Олимпијада во Рио де Жанеиро 2016 да учествувам со олимписка норма – вели Ефремов. Според програмата, трката на 400 метри е на 4 август, а квалификациите почнуваат во 12.35 по македонско време. Последен тест пред Олимпијадата ќе му биде Балканското првенство во Едрене, Турција, кое се одржува на 22 и на 23 јули. (П.П.)
Атлетиката хоби, информатиката професија
Kристијан Ефремов од пред некој ден е дипломиран информатичар. На крајот од минатиот месец го заврши Факултетот за информатички и комуникациски технологии при Универзитетот ФОН, со просек од 9,97. Претходно во сите четири години во велешката гимназија „Kочо Рацин“ бил најдобар ученик, а во завршната четврта година и првенец на цело училиште.
- Во Македонија не може да се живее од спортот. Затоа се предадов на науката – вели скромно Ефремов.
