Европратеникот и известувач Зоран Талер си поднесе оставка по скандалот објавен во британскиот Сандеј Тајмс каде пред скриена камера Талер прифаќа мито ветувајќи им на лажните бизнис партнери дека ќе излобира нивниот амандман да влезе во извештај на Европскиот Парламент.
Од самиот почеток Талер тврди дека знаел дека е наместен и сакал да види до каде се подготвени да отидат тие луѓе.
„Мојот мотив беше да утврдам кој сака да компромитира европски пратеник и известувач за Македонија, а притоа да не сторам ништо незаконски.
-Дали се навистина дозволени сите методи па дури и незаконски методи, манипулации, тајно снимање, сето тоа, мораме да признаеме, е илегално. Тоа дека не успеаја да ме фатат во незаконитост во Сандеј Тајмс се разбира не го објавија.
-Дека и два месеца притискање да подлегнам не им успеаја, не пишува. Останува и прашањето на користењето на правните средства во Британија, каде силно се борат против ваквите методи“, изјави Зоран Талер.
А1 стапи и во контакт со новинарите од Сандеј Тајмс кои го објавија скандалот но тие одбија да дадат изјава. Велат работеле тајно, па не смеело да се дознае за нив.
Уредувачката политика на Сандеј тајмс е инаку отворено анти ЕУ.
Денеска Европарламентот најави истрага за овој случај во кој се вмешани и двајца други поранешни министри, едниот од Австрија, другиот од Романија.
Талер не земал пари, ниту потпишал договор или фактура.
Талер во интерес на истрагата се повлекува од својата функција со надеж дека вистината ќе излезе на виделина. Нова европратеничка од Словенија ќе биде Мојца Клева, исто од редовите на социјалдемократите.
Талер важеше за еден од најактивните поддржувачи на Македонија во ЕУ, особено во делот на спорот за името.
