Битолски кашкавал од српско млеко
Надлежните институции велат дека во ова нема ништо незаконско, освен фактот дека се мамат граѓаните што купуваат производи од брендот „БиМилк“, мислејќи дека е македонски производ
Битолскиот кравји кашкавал, кој деновиве може се најде на полиците по маркетите, е со српско потекло. На декларациите стои дека е произведен за Битолската млекарница од фирмата ДОО „Лазар“, истата фирма е извозник на кашкавалот, а увозник е Битолската млекарница. Сточарите се вџашени од декларацијата и велат дека наместо да се троши македонското млеко, кое го има во изобилство во земјава, по пропаѓањето на Шведската млекарница се увезуваат млеко и млечни производи.
- Не сме слушнале дека има битолски кашкавал од српско млеко, но го видовме трајното млеко кое беше увезено од Битолската млекарница, а беше пакувано во Србија. За ова го известивме и Министерството за земјоделство, но оттаму не добивме никаква реакција - велат битолските сточари.
Според нив, засега нема големи проблеми со вишокот на млеко, но за еден месец, кога лактацијата ќе се зголеми, не им е јасно кој ќе го прибере целото млеко што се нуди на пазарот. Тие велат дека проблемите допрва доаѓаат и оти не' очекува нова млечна криза од големи размери.
Во Битолската млекарница потврдуваат дека е направен еднократен увоз на млеко и на млечни производи, правдајќи се дека ги нема доволно на нашиот пазар. Во овој период ИМБ дневно откупува само 110 тони сурово кравјо млеко.
- Изминатиов период се јави недостиг на млечни производи, кој особено се почувствува на пазарот. Поради тоа ИМБ се реши на еднократен увоз на млеко и на млечни производи -вели Предраг Цветковиќ, претседател на Управниот одбор на ИМБ.
Според него, „БиМилк“ е регионален бренд и нема никаков проблем што е произведен со млеко од друго подрачје.
- Кога има зголемена побарувачка мора да се обезбеди и квалитетна суровина. Што се однесува до увоз и извоз, тоа се бизнис-операции во групата млекарници на кои припаѓа и ИМБ, а тоа е „Данјуб Фуд“ системот. Тоа се прави со цел пазарот да се стабилизира и да има ценовна стабилност - вели Цветковиќ.
Тој објаснува дека во прилог на ова оди и контролата од ЕУ-комисијата од секторот земјоделство, која изминатата недела била во посета на млекарницата и го испитувала квалитетот на „БиМилк“ млекото.
- Квалитетот на млекото беше позитивно оценет, со сугестии за понатамошно подобрување на откупното млеко. Значи млечна криза од карактер на „вишоци и неоткупување“ на истото едноставно нема да има - вели Цветковиќ.
Во Ветеринарската управа велат дека нема ништо незаконско во тоа што битолскиот кашкавал е произведен од српско млеко.
- „БиМилк“ е бренд и чудно е што наместо со наше млеко, произведен е со српско, зошто народот кога го купува мисли дека е македонски производ. Но тука нема ништо незаконско, зошто на декларацијата пишува дека е произведен за Битолската млекарница - вели Дејан Рунтевски, директор на Ветеринарската управа.
Организацијата на потрошувачи на Македонија (ОПМ) нема коментар на ваквата појава. Велат дека допрва треба да утврдат дали е ова мамење на граѓаните и дали е прекршен некој закон.
- Треба да се испита целиот случај. Ние засега немаме никакви сознанија ниту за тоа дека ИМБ увезувала трајно млеко од Србија ниту, пак, дека кравјиот кашкавал е со српско производство - велат во ОПМ.
Од Дирекцијата за храна, која е најкомпетентна за контролата на храната во земјава, вчера не успеавме да добиеме одговор од одговорните лица за оваа проблематика. Добрите познавачи на состојбите велат дека увозот на млеко и на млечни производи може да направи хаос на домашниот пазар, бидејќи за еден месец производството на млеко во земјава ќе се зголеми за 40 отсто.
- Домашните капацитети ќе се преполнат, но ќе има и вишоци на српскиот пазар, кои треба некаде да се пласираат. Ќе има нова млечна криза, но единствено ни останува да се надеваме дека повторно нема да настрадаат сточарите - велат експертите.
Валентина Ангеловска
, со добар машки договор колку е фер за кого кој дел од колачот да биде.....
