Проблемот со малата Мартина во Собранието
Елена Ацевска
05.11.2009 18:02 Повик за пратениците да ја поттикнат хуманоста
Проблемот со малата Мартина се пресели во Собранието. Пратеничката на Нова демократија, Флора Кадриу, постави кутија за собирање пари на говорницата.
Побара од власта повеќе грижа за ова тешко болно девојче, а од пратениците со свој пример да ја поттикнат хуманоста.
„Ние се сомневаме дека доколку малата Мартина имаше презиме на некој од пратениците во Собранието на Република Македонија, презиме на премиерот, или пак презиме на претставници од владата, дека толку лесно ќе беше одбиена од страна на првостепената здравствена комисија, или пак од страна на второстепената здравствена комисија“, вели Флора Кадриу од Нова демократија.
Но кутијата не остана долго на говорницата. По неколку минути собраниското обезбедување ја отстрани и ја пренесе во холот на Собранието. Опозицијата му порача на министерот Османи да почне да работи. Тој не им остана должен.
Кутијата за помош беше отстранeta
„Доколку сакаше да влезе во новинарските извештаи, мислам дека требаше да избира некој друг настан, а не да манипулира со чувствата на пациентите. Можеа да се обратат до Министерството за здравство, да се запознаат со сите информации“, рече Османи, министер за здравство.
Пратениците денеска не сакаа да зборуваат во камера колку донираат. Велат биле хумани и донирале пари, а за тоа не сакале да се фалат во јавноста. Фондот за здравство одби да даде пари за лекување на 5-годишно дете во странство. Таа боледува од тежок тип на леукемија.
Потребни се 250 илјади евра за да оди на трансплантација на коскена срцевина во Франкфурт.