Вистината за анкетниот лист на Бранко Црвенковски ќе се дознае до крајот на месецов. Таков исход најавува првиот човек на Управата за јавни приходи, откако бизнисменот Љупчо Палевски минатиот месец тврдеше дека Црвенковски не навел 160.000 евра аванс, кои неговата сопруга Јасна со партнерите од „Семос“ ги уплатила за деловниот простор во „Тифани“.
„За претседателот Црвенковски е оформен предмет, досие. Обезбедени се добар дел од доказите, чекаме уште мал дел и веруваме дека во некој пристоен рок од 20-тина дена Управата ќе се произнесе со сите тврдења и шпекулации што беа изнесени во медиумите“, рече Горан Трајковски, директор на УЈП.
Од УЈП пред петнаесетина дена тврдеа дека ќе го повикаат Црвенковски на отчет пред даночните служби. Од кабинетот велат дека никој досега не го повикал, но и повторуваат дека Црвенковски не гледа причина за такво нешто.
Црвенковски тврдеше дека постои интерен договор меѓу четворицата партнери од „Семос“, во кој се гледа дека неговата сопруга не уплатила ништо за деловниот простор. УЈП бараше писмен доказ за ваквото тврдење, кој не е доставен.
Од даночната управа се одлучија да проверуваат откако сопственикот на „Тифани“, Палевски, им однесе нотарски договор на кој освен договорот за уплатен аванс, стои и името и потписот на Јасна Црвенковска.
Непријавениот аванс бил уплатен во кеш, летото 2002-ра, за купување деловен простор за „Семос“, а 160-те илјади останаа кај Палевски. Антикорупција не отвори случај, но писмено го побарале основниот договор за купување деловен простор во „Тифани“.
Палевски најавува дека ќе им го достави и ќе понуди дополнителни документи. Тој најавува дека в четврток ќе поднесе кривична против Црвенковски и тужба за клевета.
