Некој навистина се поигрува не само со нервите туку и со судбината на фудбалерите на Вардар. Постојано им се ветува дека денес, а потоа утре, и којзнае кога ќе им бидат исплатени барем една од петте плати што им ги должи клубот, дека ќе им бидат платени кириите за становите во кои еден дел од нив живеат но ништо од тоа. И вчера играчите во соблекувалната на арената „Филип Втори“ чекаа некој од тие членови на иницијативниот одбор за спас на клубот да им ги донесе ветените пари, барем една плата, и како што самите во шега велат, да видат како изгледа денар бидејќи веќе и заборавиле кога последен пат примиле плата. Таа им беше ветена и во петокот пред средбата со Тетекс, залудно ја чекаа. Им беше кажано дека вчера конечно ќе им биде исплатена и пак лага, до лага. „Вака повеќе не оди, беа зборовите на Оливер Пеев. До кога ќе се поигруваат со нас, до кога ќе не лажат. Нашето трпение веќе ја прели чашата од денес нема тренинзи се додека не добиеме барем некој дел од платите што ни ги должи клубот. Од нас се бара да играме, играме колку што можеме, но во ваква хаотична ситуација во клубот не можеме повеќе. ние играчите и не знаеме кој практично раководи со клубот, кому да му веруваме. Човекот, кој се претставува како спонзор и сака да го преземе Вардар ни ветува дека се ќе се среди дека тој ќе го преземе целосно финансирањето на Вардар но никако да се договори околу преземањето со членовите на иницијативниот одбор за спас на Вардар. Гледате во каква ситуација се наоѓа клубот, во зоната која сигурно го води во бараж за опстанок во првата лига доколку нешто не се преземе. А во наредните кола не очекуваат мечевите со Македонија, Ренова, Работнички, ако ги загубиме можеме да се сметаме за второлигаши.
Новиот претседател на клубот Драги Сетинов е немоќен и самиот е во ситуација кога не знае каков потег да повлече врзан е со некои барања од тие т.н. спасители на Вардар.
-Светислав Јакимовски, кој сака да го преземе клубот бара да ги има под свое сите 29 делегации од собранието на клубот и сам да управува со него. Тој вети дека секој месец ќе вложува во Вардар по 40-50 илјади евра но како што вели сака сам да одлучува за се. Меѓутоа, комитите кои сега имаат мнозинство во собранието со 22 делегати бараат тој да вложи банкарска гаранција за да му го предадат клубот, но фирмата „Мода и спорт“ на Орце Камчев кој исто така е член на тој колективен одбор и има седум делегати не сака да се откаже од нив и тука е спорот. За вечерва, доцна синоќа е закажан нов состанок на Иницијативниот одбор за спас на Вардар повторно да ја разгледаме целата оваа ситуација, мора да се најде некое решение, вака повеќе не оди. Немаме резултати, играчите се закануваат со штрајк, освен тоа поради неисплатени обврски во јануари имаат право да бидат слободни и лесно може да се случи Вардар да остане комплетно без стандардните првотимци а тоа ќе биде најлоша варијанта, беа зборовите на Сетинов.
Времето минува, Вардар се' повеќе тоне, не се гледа крајот на неговата голгота. Имаме впечаток дека сите вмешани во тој одбор за спас на Вардар сами себе си се лажат на штета на клубот. Никој не сака да признае дека токму тој Иницијативниот одбор кој требаше да го спаси Вардар го доведе во оваа безизлезна состојба. И уште една вест што ја слушнавме вчера од играчите на Вардар, се очекува да дојде до смена во Стручниот штаб, сегашниот тренер Марио Вујовиќ да го замени поранешниот селектор на македонската фудбалска репрезентација Никола Иливски-Џиџи за што притиска наводно новиот спонзор, кој треба да го преземе клубот.