Црна Гора денес ќе го признае Косово
Црна Гора денес ќе го признае Косово
На дневен ред на денешната седница на Владата на Црна Гора е и признавањето на независноста на Косово, потврди црногорскиот министер за сообраќај д-р Андреја Ломпар.
Од владата на Црна Гора велат дека седницата која започнала нешто по 12 часот се уште е во тек и ќе заврши кога ќе се донесат одлуки по сите точки на дневниот ред.
Се очекува попладнево, црногорската влада да донесе одлука за признавање на независноста на Косово.
Подгоричкиот весник „Вијести“ цитирајќи извори блиски до државниот врв, денеска пишува дека црногорската Влада ќе донесе одлука за признавање на независноста на Косово.
Сепак од процедурални причини не ја исклучуваат можноста, одлуката евентуално да биде накратко одложена, но, напоменуваат дека речиси се е подготвено владиниот кабинет денеска и официјално да ја обелодени намерата да воспостави дипломатски односи со Приштина.
Премиерот Мило Ѓукановиќ и шефот на дипломатијата Милан Рочен, минатиот петок во Парламентот најавија дека нема никакви пречки Црна Гора да го признае Косово, како и шефот на државата Филип Вујановиќ, потсетува весникот .
Вчерашната одлука на Генералното собрание на ОН, за прашањето на едностраното прогласување за независност на Косово да се изјасни Меѓународниот суд на правдата, нема да влијае на одлуката на Црна Гора, наведува весникот „Вијести“.
Претседателот на Собранието на Црна Гора, Ранко Кривокапиќ, рече, дека признавањето на Косово е нераскинлив дел од обврската на Црна Гора и придонесува за регионалната стабилност.
„Не гледам друг начин да се придонесе за стабилноста, освен преку јасно одредување кон независноста на Косово“, изјави Кривокапиќ.
Напоменувајќи дека станува збор за политичка, а не правна одлука, Кривокапиќ прецизира дека признавањето на државата „ е во доменот на политичката сувереност на секоја држава и мислам дека тоа е дел од нашите европски интеграции.
„Црна Гора, во рамки на своите национални интереси треба да оди понатаму на патот кон ЕУ и НАТО. Составен дел од тоа е нашиот однос кон регионалната стабилност, а клучен елемент на регионалната стабилност сега е Косово“, истакна Кривокапиќ.