Инфо од МИА.мк :salut:
Москва, 26 август (МИА) - Русија денеска ја призна независноста на отцепените грузиски автономии Јужна Осетија и Абхазија.
Претседателот Дмитриј Медведев преку државниот ТВ канал Русија, потврди дека потпишал указ за признавање.
- Потпишав указ со кој Русија ја признава независноста на Јужна Осетија и Абхазија. Русија повикува и други држави да го следат нејзиниот пример, Тоа не е лесен избор, но е единствена можност да се заштити животот на луѓето, изјави Медведев.
Тој ја даде изјавата по состанокот на рускиот Совет за безбедност во Сочи. На него беше разгледана декларацијата на двата дома на парламентот во кој се повикуваше Медведев да ја признае независноста на двете сепаратистички области. На седницата присуствуваше и актуелниот премиер на Русија Владимир Путин.
Претседателот Медведев потсети дека Москва „пројавила воздржаност и трпени“.
- Ние неколкупати повикавме да се вратиме на масата за преговори и не ја променивме позицијата дури и по едностраното признавање независност на Косово. Но, нашите предлози кон грузиската страна да се склучи со Абхазија и Јужна Осетија договор за некористење сила останаа без одговор. За жал тие беа занемарени и во НАТО и во ОН. Сега е јасно дека мирното решение на конфликтот не влегувало во плановите на Тбилиси. Грузиската Влада систематски се подготвуваше за војна, изјави Медведев.
Рускиот парламент вчера побара од шефот на државата да ги признае отцепените Јужна Осетија и Абхазија.
- Ние сме должни да го поддржиме стремежот на народите на Јужна Осетија и Абхазија кон стабилност, мир и независност, изјави вчера претседателот на Советот на федерацијата Сергеј Миронов за време на седницата.
Според него, по распадот на поранешниот Советски сојуз грузискиот Парламент со незаконска одлука ја лишил Јужна Осетија и Абхазија од автономија, што предизвикало граѓански отпор.
Француското Министерство за надворешни работи соопшти денеска дека „жали поради таквата одлука“ на Русија за признавање на Јужна Осетија и Абхазија како независни држави.
- Сметаме дека тоа е разочарувачка одлука и ја повторуваме нашата заложба за територијален интегритет на Грузија, изјави портпаролот на МНР на Франција.
Грузија го смета за анексија потегот на Москва со признавање на Абхазија и Јужна Осетија.
- Признавањето на Абхазија и Јужна Осетија од страна на рускиот претседател е адекватно на анексирање од Москва на грузиска територија, изјави заменикот министер за надворешни работи Гига Бокерија.
Британската Влада категорично го отфрли признавањето на Јужна Осетија и Абхазија од страна на официјална Москва и изрази поддршка за територијалниот интегритет на Грузија.
Американскиот Стејт департмент ја оцени како неприфатлива вчерашната декларација изгласана од двата дома на рускиот Парламент со која се повикува претседателот Дмитриј Медведев да ги признае грузиските сепаратистички републики Абхазија и Јужна Осетија
