Русите нема да штедат на ракети
Русија, и покрај економската криза, годинава ќе ги зајакне својата авијација и ракетните единици
Без оглед на економската криза, Русија има намера да ги исполни сите свои планови за финансирање на модернизацијата на својата армија. Нема да се штеди на најнови ракети и противвоздушни системи, како и на нови авиони и хеликоптери. Државата директно ќе ги помага фабриките што произведуваат оружје, бидејќи каматите на кредитите кои ги даваат банките се превисоки и изнесуваат од 20 до 25 отсто, објасни Владимир Поповкин, началник на Одделот за вооружување во Министерството за одбрана на Русија. Со тоа што фабриките директно ќе добијат пари од државата ќе се спречи можноста за различни махинации. Годинава ќе се купат 49 авиони, 31 хеликоптер, 304 оклопни возила, подморница на дизел „Санкт Петербург“.
Се планира завршување на испитувањата на атомската подморница „Јуриј Долгорукиј“, која ќе биде вооружена со балистички ракети „булава“ кои можат да носат атомски боеви глави. Се очекува по завршувањето на сите проби да почне и сериско производство на „булава“. Таа ракета лета на цврсто гориво и во фаза на падот атомските глави можат да ја менуваат патеката на движење. Експертите утврдија дека неуспешните проби биле предизвикани од грешки во производството во фабриката „Воткинској“. Руските генерали велат дека станува збор за крајбрежен ракетен систем „Бастион“.
Поради тоа што Русите одлучија да купуваат нова воена техника се намали потребата за купување ремонтни делови, па на тоа се заштедија пари од кои во текот на три години ќе се набават 24 нови авиони, осум хеликоптери, четири противвоздушни системи „Панцир“. Покрај тоа, ќе бидат модернизирани 16 јуришни авиони „СУ-25“ и 40 транспортни хеликоптери „МИ-8“. Комплексите „Панцир“ би требало да ги заменат застарените „Тунгуски М1“. Задачата на „Панцир“ е во радиус од 20 до 25 километри да ги заштити важните објекти од нисколетачки ракети или беспилотни летала. Радарот што го користи „Панцир“ може да следи на растојание од 36 километри 20 цели кои се движат дури и на висина од два метра. „Панцир“ може истовремено да гаѓа три цели.
Системот „Панцир“ не им дозволува на противниците да им се прикрадат на комплексите „С-400 триумф“ и познатиот „С-300 фаворит“. Годинава на боево дежурство ќе биде поставен уште еден полк од новите интерконтинентални ракети „Топољ-М“.
Русија планира во текот на годинава во вселената да лансира шест воени сателити. Меѓу нив ќе бидат и најновите типови руски разузнавачки сателити. Задачата на руските воени сателити ќе биде не само да гледаат што се случува на земјата во одредени делови од светот туку и навреме да соопштат ако некоја држава лансира ракета. Поради долгогодишната беспарица, особено во времето на владеењето на Борис Елцин, Русија не го обновуваше и зголемуваше бројот на воени сателити, па нејзината армија се' помалку гледаше и постоеше опасност тотално да ослепи. Јасно е дека на Русите не им недостасуваше знаење, туку раководството во Кремљ не сметаше дека е од голема важност во време на недостиг од пари да финансира „вселенска шпионажа“.
http://www.utrinski.com.mk/?ItemID=29C7495370E64248AE1AD2BBA0419CE5
