ДПА излезе од Владата
Скопје, 13 март (МИА) - Највисокиот партиски орган на ДПА, Централното собрание вечерва во Сарај едногласно ја потврди одлуката на партиското раководство за напуштање на владината коалиција.
- Нашата партија од вечерва или поточно од утре повеќе не е член на коалицијата што почна да работи пред 19 месеци. Оваа одлука не е насочена против никого, ни против ВМРО-ДПМНЕ, ни против ДУИ, ни против СДСМ, ни против Македонците, туку напротив е про државата Македонија, про суверенитетот и интегритетот на Македонија и про патот кон евроатланските интеграции. Се надевам дека сите озбилни фактори внатре во државата и нашите најголеми поддржувачи - меѓународниот фактор ќе ја разберат како последен обид да се растури инструментот што води кон добра перспектива на Македонија, рече претседателот на ДПА Мендух Тачи на прес-конференција по седницата на Собранието на партијата.
Тој нагласи дека нивната одлука е конечна и неотповиклива и оти нивните барања произлегуваат од Охридскиот договор. - Сите барања кои ДПА ги поставува се точки на Охридскиот договор. Ние ништо ново не баравме освен признавањето на Косово. Барањата на Албанците во Македонија се стари 17 години, а во делот на нивното неостварварување вина сноси и ДПА, рече Тачи, потенцирајќи дека нивната рака е подадена за соработка и за постигнување договор Македонија што побрзо да влезе во евроатланските структури со сите фактори кои се важни за постигнување на таа цел.
Претседателот на ДПА рече дека ја почитува коректноста на преимерот Грувески, кој како што кажа, чекал одлуката на ДПА да стане конечна па потоа да се изјасни. Тој посочи дека од утре сите релевантни фактори во Македонија ќе се обидат да постигнат политички консензус за влез на Македонија во НАТО.
Прашан дали е точно оти премиерот Никола Груевски не сака Македонија да влезе во НАТО, Тачи рече дека Груевски и ВМРО-ДПМНЕ не се единствените дежурни кривци за настанатата ситуација. - Вината сите ја сносиме можеби Груевски најмалку бидејќи помалку време од нас е во раководните структури. Луѓето кои сакаат евтини политички поени во овој период не се сериозни, рече Тачи.
Во врска со поканата од НАТО и проблемот со името со Грција, Тачи нагласи дека се надева оти, како што рече, нашите поддржувачи ќе успеат да издејствуваат решение никој да не чепка во идентитетот.
- Ако ги решиме сите проблеми кои ги имаме ќе ја доведеме Грција во многу тешка состојба да стави вето. Како партија поддржуваме идентитетот и името да не се чепка, но не поддржуваме политика на фрустрации каде сака некој да профитира. Нема да дозволиме никој, ниту Грција ниту пак било која земја да чепка по идентитетот на на нашите сограѓани, порача Тачи.
Прашан дали излегувањето од коалицијата не е направено во договор со Грција со цел Македонија да не влезе во НАТО, Тачи рече дека тој сигурно е еден од македонските политичари кои грчката влада не ги сака. - Немам ни минимално разбирање за ветото на Грција и за злоупотребата на историјата што ја прават, истакна Тачи.
