Патриотштина на македонски начин!
Едночинка - мала сцена.
На сцената две момчиња на околу 25-30 години и еден постар човек со засукани мустаќи.
Момчињата се туркаат и расправаат. Им се приближува човекот.
Ги прекинува во расправијата.
Човекот - Зошто се расправате, не чини така, не е ли поубаво да поразговарате, отколку да викате, да се тепате и да се карате? А за што се расправате?
Трпе- Се караме кој е поголем патриот. (Трајко молчи и гледа во човекот како да го познава, ама не може да се сети кој е)
Човекот - Како те викаат сине??
Трпе - Ме викаат Трпе!
Човекот - а тебе дете?
Трајко - мене ме викаат Трајко!
Човекот - А бе вие македонци сте биле!
Обајцата- Од каде знаеш, бе чиче?
Човекот - Еее, деца, деца, само вие македонците имате имиња како Трпе и Трајко, само вие трпите и траете додека ве газат.
Трајко - не бе чиче, ние сме многу јаки, особено позади компјутер, ние водиме војна со секого и сме најјаки!
Човекот - Да бе дечња, ама битките ги биете од Табановце до Богородица, преку компјутер, а на улица каде сте?
Трпе - Е да, да, така е, ама мора така.
Човекот - Е зошто да мора?
Трајко - Чиче, па ако се побуниме може да не истепаат, нели ни закачија Вето за НАТО. Вака полесно е. Ќе потрпиме, ќе потраеме, има кој да ни ги бие битките.
Трпе - Америка, Америка ке ни помогне.
Човекот - Америка ке ви помогне? Како ќе ви помогне? Не ми се чини дека нешто многу ќе ви помогне. Да не ви помогне како Бугарија на времето? Или Србија, Франција? Не ја бива така.
Обајцата – Како да не, ти знаеш. Зошто не ја бива така?
Човекот - Треба самите, оти никој не ви се вистински пријател и нема да ви помогне ако претходно самите не си помогнете. Досега не научивте ли?
Трајко - Хмммм.....ама Трпе е за ВМРО, а јас сум за СДСМ. Како да се договориме. Нема шанси.
Трпе - Ти си некоја комуњара, чиче, како оваа гнасава, Трајче да му ебам мајче, изрод.
Почнуваат да се кошкаат и да се туркаат. Човекот ги разделува.
Човекот - Де, де, не мора да се расправате и тепате, секој нека верува во што сака, ама најмногу во Македонија, нели. Нели сте патриоти?
Заедно, Трпе и Трајко, викаат (не се знае кој кого ќе надвика ) – Јас сум патриот, најголем!
Човекот - А има некој кој не е ни за ВМРО, а ни за СДСМ?
Истовремено и Трпе и Трајко - Нема шанси, ако не за моите, предавник е, мора да е за другите. А ти од каде си? И кој си ти да ни солиш памет. Сигурно и ти си некој предавник. Како те викаат?
Човекот (полека ја ниша главата вчудоневиден на гневот од обајцата, се насмевнува, ги сука мустаките и полека мрморејќи, како сам со себе, заминува) - Мене? Ме викаат Гоце, Гоце Делчев!
Еее, Македонијо моја мајко, сестро и невесто....тешко и горко на тебе.
Трпе и Трајко се чешкаат за глава, како да не можат да се сетат на нешто важно.
Одеднаш Трпе му се врти на Трајко.
Трпе - Трајче, ајде бе на пиво пред кооперација, батали го, не гледаш дека е некој предавник, намерно пуштен да провоцира.
Нашол некојси Гоце па уште и Делчев да ни кажува нам како треба да се бориме за Македонија. Провокаторче некое, гледај какви му се мустаќите, пих. Предавник.
Трајко - А бе познат ми е од некаде, ама не можам да се сетам. Некој предавник со гаранција, го имам видено некаде на слика. Ај, не можам да се сетам, нека крши глава.
Туку, добра идеја за пивото, ама ти частиш, ти имаш повеке пари, ти си сега на власт.
Трпе (му удира на Трајко една тупаница по плеки) - Како не бе, а кој крадесе 15 години? Србоман комуњарски!
Трајко (му враќа по стомак) – Бугарашиште едно, предавник.
Почнуваат да се тепаат.
Завеса.
