Лука Тони е првиот фудбалер што ќе биде исфрлен од италијанската репрезентација во реконструкцијата што наскоро ќе ја почне селекторот Марчело Липи, шпекулираат медиумите на Апенинскиот Полуостров. Искусниот стручњак веќе три дена е на удар на домашната фудбалска јавност поради дебаклот на Купот на Конфедерациите каде Италија оствари само една победа и два пати загуби и уште во фазата по групи го заврши своето учество. Во прв момент тој застана во одбрана на фудбалерите и објави дека не планира промени, туку дека ќе се обиде во претстојната година до почетокот на Мундијалот да ги исфрли недостатоците и да ја одбрани титулата освоена во Германија.
Сепак, медиумите во Италија веќе почнаа со лицитацијата на фудбалери кои мора да го напуштат националниот тим. Газета дело спорт објави дека прва жртва ќе биде фудбалерот на Баерн Минхен, Лука Тони, па во вчерашното издание на насловната страница излезе со наслов: "Довидување Тони". Робусниот напаѓач е на удар уште од минатото лето и настапот на Европското првенство во Австрија и Швајцарија каде не постигна ниеден гол, а Италија доживеа елиминација во четвртфиналето од Шпанија која подоцна стана континентален првак. Неофицијално, Џанлука Ѕамброта и Џенаро Гатусо се следните двајца додека Џанлуиџи Буфон и особено Фабио Канаваро засега остануваат во националниот тим и тие се единствените двајца фудбалери од генерацијата што ја освои титулата на СП 2006 што ќе останат и натаму во тимот.
Покрај ова, Липи планира и да ја смени тактиката. Од офанзивна формација 4-3-3, најверојатно ќе се врати на 4-4-2, па дури и на дефанзивен систем 4-2-3-1. Новото лице на "аѕурите" тој планира да го претстави на пријателскиот натпревар против Швајцарија што се игра на 12 август во Базел.
