нова иницијатива за обелоденување на тајните досиеја за „розвел“
Вашингтон крие дека не сме сами
Треба да сме спремни да посегнеме надвор од нашата планета и од нашиот Сончев систем за да откриеме што навистина се случува таму - изјави поранешниот астронаут Едгар Мичел
Астронаутот Мичел најдолго од сите луѓе пешачел по Месечината
Луѓето не се сами во Универзумот, а вонземјани несомнено ја посетувале нашата планета, тврди пензионираниот астронаут Едгар Мичел, член на мисијата „Аполо 14“ и рекордер според должина на прошетка по Месечината.Спроти прославата на Денот на Земјата, Мичел на конференција на уфолози изјави дека Вашингтон и други влади ја прикриваат вистината дека постои вонземен живот.
- Човештвото долго се прашува дали сме сами во Универзумот. Но, дури во нашиот период навистина имаме докази. Не, не сме сами. Нашата судбина, според мене, е да станеме дел од планетарна заедница. Треба да сме спремни да посегнеме надвор од нашата планета и од нашиот Сончев систем за да откриеме што навистина се случува таму - изјави Мичел.
Поранешниот астронаут израснал во Роузвел, Њу Мексико, едно од најтаинствените места во светот. Се смета дека таму во 1947 година паднало вонземско летало. Регионот веќе половина век е непристапен, бидејќи таму е изградена база на военото воздухопловство на САД. Мичел тврди дека уште кога бил дете жителите на Розвел добивале „препораки“ од офицери да не зборуваат за нивните искуства, како и закани за „опасни последици“ ако проговорат. Но, Мичел вели дека многумина решиле „да не заминат в гроб со своите приказни“ и му се исповедиле, како на земјак што стасал и до Месечината.
Уште пред десет години Мичел тврдеше дека добил дозвола од Пентагон да зборува за тоа што му го кажале соседите од Розвел. Тој појасни дека неименуван адмирал од Здружениот генералштаб на воените сили ветил дека ќе ја објави вистината за приказната за Розвел. Адмиралот наводно ја потврдил информацијата за уривањето на неидентификуван летачки објект, но оти подоцна, кога се обидел до детали да ја истражи приказната, му бил блокиран пристапот до доверливите материјали. Адмиралот сега, според Мичел, самиот го демантира својот исказ.
- Ги повикувам колебливите: Читајте книги, читајте ги поуките, почнете да разбирате што навистина се случувало, бидејќи навистина нема сомнение дека не' посетиле. Универзумот во кој живееме е многу поегзотичен, повозбудлив, покомплексен и подалечен отколку што сме успеале да дознаеме досега - изјави Мичел.Претставникот на НАСА, Мајкл Кебиџ, вчера демантираше дека Националната администрација за вселена и аеронаутика прикрива информации за НЛО во Розвел.
НАСА тврди дека во Розвел во 1947 година паднал експериментален балон
- НАСА не следи НЛО. НАСА не е вклучена во какво било прикривање на вонземен живот на оваа планета и кај-годе на друго место. Точка! - изјави Кебиџ.Низ светот, од обичните луѓе па до академските кругови, се' уште се дебатира што навистина се случило во Розвел во 1947 година. Седумдесет и деветгодишниот Мичел, на пример, е астронаут, морнарички офицер, доктор по аеронаутика и астронаутика на престижниот Технолошки институт во Масачусетс (МИТ), магистер по аеронаутичко инженерство на постдипломските морнарички студии, како и почесен доктор на четири универзитети во САД.
Военото воздухопловство на САД во 1994 година објави дека остатоците откриени во 1947 година биле од урнат балон, но не даде дополнителни информации оти тоа бил строго доверлив проект.Сривен Басет, шеф на Истражувачката група парадигма (ПРГ) и организатор на конференцијата на уфолозите, вели дека информациите за вонземниот живот се прикриваат оти се политички експлозивни.
- Има трет колосек во политиката на Америка, а тоа е прашањето за НЛО. Тоа е многу порадиоактивно прашање отколку што Социјалната безбедност некогаш сонувала - наведува Басет. Тој побара од администрацијата на Обама да ги објави сите доверливи документи за владините контакти со суштества од други планети.