Странците во Ф. Работнички играат на диво
Поради нерегулиран престој во Македонија кошаркарите на Филиповиќ и Љуца не добија визи од амбасадата на Бугарија во Скопје да патуваат со екипата во Софија на мечот со Левски
Требаше некоја наша екипа, кошаркарска, да се подготви да замине надвор од нашата земја, да одигра официјален натпревар и на виделина да излезе скандал. Странците во Македонија играат на диво, без регулиран престој. И скандалот да биде поголем тоа му се случи на нашиот "најорганизиран" клуб Ф. Работнички кој утре гостува во Софија, каде во рамките на редовното коло од Балканската БИБЛ лига треба да одигра со домаќинот Левски. Тренерот Марин Докузовски ни крив ни должен денеска на пат за Софија ќе мора да ги поведе само домашните кошаркари, додека странците од Србија Владимир Филиповиќ и Ерсид Љуца остануваат во Скопје бидејќи амбасадата на Бугарија не сакаше да им издаде визи, поради нерегулиран престој во Македонија.
Во Кошаркарската федерација на Македонија велат дека странците за играње во Македонија треба да достават исписница и сертификат од федерацијата, односно земјата од каде доаѓаат. Се друго е во надлежност на клубовите вклучувајќи го и регулираниот престој во Македонија.
- Точно е дека не добивме визи за нашите играчи странци во амбасадата на Бугарија бидејќи ни фалеше еден документ. Денешното заминување за Софија, во раните утрински часови, ќе го одложиме за одредено време да ги повлечеме патните исправи на Филиповиќ и Љуца од амбасадата на Бугарија во Скопје и врз основа на тоа подоцна да го добиеме потребниот документ и визи за комплетни да заминеме во Софија. Верувам дека за кусо време ќе ја завршиме целата работа, вели директорот на КК Ф. Работнички Горан Костовски.
Во целата срамна ситуација тој само заборави на едно, Филиповиќ и Љуца не се од вчера во Скопје и се знае каква е процедурата кога странци подолго време престојуваат во Македонија. Многу интересно ќе биде ако се ѕирне во другите кошаркарски клубови од Македонија кои имаат по најмалку двајца странци. Ќе излезе дека имаме диво првенство, со диви кошаркари.