- Член од
- 17 октомври 2011
- Мислења
- 13.797
- Поени од реакции
- 33.617
Yellowjackets (2021) е уште една од сериите од последниве неколку години која сметам дека заслужува тема на форумов. Станува збор за американска трилер серија креирана од Ешли Лајл и Барт Никерсон за Showtime. Во серијата глумат Софи Нелис, Џасмин Савуа Браун, Софи Тачер, Саманта Ханрати, Лив Хјусон и Кортни Итон како група тинејџерки, членови на средношколски женски фудбалски тим, кој доживува авионска несреќа во 1996 и Мелани Лински, Тони Сајпрес, Џулиет Луис, Кристина Ричи, Лорен Амброуз и Симон Кесел како возрасната верзија на истите девојки, од 2021. Глумат уште и Ела Пурнел, Стивен Кругер, Ворен Кол и Кевин Алвес.
Премиерата на серијата беше на 14 ноември 2021 на Showtime и имаше навистина забележителен успех изминативе 2 години. Критичарите пред се ги пофалија приказната и глумата. Серијата беше номинирана за 7 ЕМИ награди, меѓу кои и за глумата на Мелани Лински и Кристина Ричи. Во декември 2021 серијата беше обновена за уште една сезона која имаше премиера во март 2023. Во декември 2022, беше обновена и за уште една, трета сезона.
Станува збор за средношколски тим во женски фудбал од училиште во Њу Џерси, кои по освојувањето на државното првенство на Њу Џерси, патуваат во Сиетл за националниот шампионат. Но, нивниот авион се урива среде дивина во Канада, каде остануваат заглавени цели 19 месеци. Серијата ги следи нивните обиди да преживеат, како и (паралелно) животите на преживеаните, 25 години по падот на авионот, во 2021, каде случувањата од дивината се уште влијаат на нивното секојдневие и однесување, многу години по нивното спасување.
Серијата колку и да не е идентична, не може да не биде споредувана со романот „Господар на мувите“ од Вилијам Голдинг. Со него ја делат не само сличностите во приказната, туку и целата аура во која е обвиен наративот, мрачната позадина и трилер елементите, како и прашањето „во што може да се претвори човек само за да преживее?“
Јас се навлеков и само за еден ден ја изгледав цела прва сезона. Верувајте - добра е! Можеби ги има неизбежните средношколски клишеа, но заслужува да биде видена. Неодамна конечно ја ставија и на нашиот SkyShowtime, па ако ве мрзи да симнувате, можете да ја најдете таму.
