За жал гроундхопингот, ултрас културата и воопшто спортската култура се на многу ниско ниво кај нас, што од лошиот спорт, што од немаштија, што од други приоритети но нејсе. Од 2016 до 2024 живеев во Германија и искрено нема подобра западна земја за да се заразиш со тифо култура.
Во Германија бев скоро редовен на Ајнтрахт Франкфурт (кога и да најдев карта),а две сезони преку познаник од Босна имав и сезонска карта за NWK трибината каде што се сместени разно разните ултрас групации од Франкфурт. Интересно е што на оваа трибина како членови на ултра групациите можеш да сретнеш од доктори, професори до наркомани, криминалци, алкоси како едно до едно гушнати пејат и пијат. Инаку самите утакмици се спектакл и мора да си испланираш цел ден поради гужвите но исто понудата на забава во и околу стадионот и за деца и за возрасни е огромна. Пред стадионот има разни тезги со пиво, колбаси и переци. Исто има неколку кои ги држат самите ултрас франкфурт, па сиот профит од нив се донира за групата. Исто ултрасите имаат пред влезот на стадионот контејнери за донации преку кои се финансираат кореографиите. Инаку самите УФ97 се поделени на неколку подгрупи од кои дел од нив имаат сопствени задачи како на пример Биндинг Сцене кои се задолжени околу креативниот дел како графити и кореографии, Дроогс ФФМ кои ја водат групата од правен аспект, прават ПР ,ги водат форумите и ги организираат состаноците на групата и Бригаде Насау кои се задолжени за проблемите, како бранење на трансови, пиротехника, bare knuckle тепачки итд. Исто овие подгрупи се поделени на уште помали групации преку кои се организираат гостувањата. И уште нешто доста интересно се изненадив колку наши дијаспорци претежно таму родени можеш да начекаш да одат со Ултрас Франкфурт 97, најголем дел од источна Македонија, но и од Битолско-Охридскот крај.
Покрај Франкфурт, сум ги посетил скоро сите стадиони во покраината Хесен од 1 до 4 лига, Дармштад од тука ќе ги издвојам како група и воопшто атмосфера што позитивно ме изненади.
Исто сум бил долж попреку по скоро сите поголеми фудбалски градови кои вредат да се посетат. Од Кајзерслаутерн на запад (најзаебан гостински блок, бидејќи е премногу стрмен), до Динамо Дрезден на исток и од Баерн Минхен (иако атмосферата е далеку подобра и "понародска" на Минхен 1860) до Хамбург и Росток на север. Стадиони според мене кои вредат да се посетат, апсолутно на Шалке, А. Франкфурт, Кајзерслаутерн, Хамбург, Ханза, Динамо Дрезден, Минхен 1860, Дармштад. Од друга страна преценети стадиони и за жал искомецијализирани се Алианц Арена и Сигнал Идуна Парк. Две дербиња кои не се познати кај нас а атмосферата е лудило е Брауншвајг - Хановер и според мене најподеленото дерби во Германија Локомотива Лајпциг против Хеми Лајпциг, за 8-10€ добивате лудило. Имено Локо се повеќе десно ориентирани, а Хеми се лево ориентирани искрено никогаш не знаев дека градот е до толку поделен и до толку би се мразеле германците меѓу себе.
Исто и по европа имам јаки причи и сум посетил стадиони во Холандија (Волендам, Венло, Емен, Фортуна Ситард), Белгија (Стандард Лиеж, Андерлехт), Шпанија (Реал Сосиедад, Атлетик Билбао, Алавес), Австрија (скоро сите сум ги посетил но најмногу впечаток ми оставиле Австрија Салцбург и Рапид Виена), Шведска (исто позитивно изненадување дербито АИК - Јургорден, по нашки Џургарден),Италија (исто одлична земја за љубителите на тифото), Чешка (Спарта и Славија) и нормално скоро цел балкан и огромен дербиња било фудбал или кошарка(во Србија и Грција).
Да знае жена ми колку пари сум оставил на фудбал и генерално спорт ќе ме исфрли од дома. Желба голема ми се Марсеј - ПСЖ и Лион - Ст. Етиен но за жал не можев никако да дојдам до карта. Али следно би сакал малце на исток да се префрлам во земји како Полска и да се среди ситуацијата Русија обавезно, па од Русија слушнавме прича, ако некој има нешто од Полска да сподели би сакал да прочитам.
Ви посакувам на сите среќна и успешна 2026 и честит Божиќ.
ПС.Доколку планирате посета на Германија и сакате фудбал екипи каде што за евтини пари и наједноставно може да најдете карта преку нивниот сајт се: Мајнц, Хофенхајм, РБ Лајпциг, Леверкузен и Волфсбург од Бундеслига 1 и Херта од Бундеслига 2.
