ПИСМО НА ВРАНИШКОВСКИ
Ни смета предзнакот "македонска"
На Јован Вранишковски и неговите приврзаници им смета во името на македонската православна црква да стои зборот Македонска и од тие причини го прифатиле предлогот црквата да ја нарекуваат охридска.
Ова екс владиката на МПЦ го напишал во писмото што завчера му го испратил на грчкиот Архиепископ Христодолус. Во него Јован тврди дека државата непринципиело ја вмешала црквата во проблемот што го има со името.
-Ние прифативме да го носиме славното име на Охридската Архиепископија, а не името со национален предзнак како што тоа го прават расколниците самонарекувајќи се Македонска Православна Црква. Во самата држава не се сите Македонци", зашто многу се верници кои се декларираат како: Срби, Бугари, Грци, Власи. Ним на сите им пречи во името на Црквата да стои определбата македонска", му пишува Вранишковски на Христодолус, притоа ословувајќи го како Архиепископ на цела Грција, што исто така е користење национален предзнак.
Грчката православна црква, пред две недели официјално соопшти дека финансиски го помага Јован и неговата ПОА. Извори за Сител тврдат дека, иако Атинската архиепископија нагласува дека тоа е сумболична сума, сепак во игра се големи суми.
Пред една година и Српската влада призна дека го финансирала Вранишковски.
