и во продолжение...
Што направи СДСМ
три ГОДИНИ ОД УБИСТВОТО НА ЈОСИФОСКИ
Секоја вечер ни пукаат пред куќата и кошот
Како јагне ни го оттргнаа Ванчо, ни го зедоа курбан за цело Тетово, за Македонија, низ воздишки раскажува Весна Јосифоска, мајка на матурантот што беше убиен на денешен ден пред три години додека играше кошарка со другарите. Тетовското јавно обвинителство, три години по злосторството поднесе обвинение против Бурхамедин Нухиу од селото Порој, поради основано сомневање дека на 19 октомври 2002 година со умисла го убил Ванчо Јосифоски.
Според обвинението, Нухиу од автомобил "опел аскона" во движење, со рафал од автоматско оружје пукал во групата од 30-ина момчиња додека играле кошарка на импровизираното игралиште покрај стариот градски стадион во Тетово.
Ванчо почина на игралиштето, на само стотина метри од својот дом, а тешко повредени беа Душко Билбиловски и Небојша Стојановски.
Мајката на Ванчо не може да ги скрие болката и горчината.
- Боли, премногу ме боли. Душата ми поцрне за него оти беше чист како солза. Не можам да сфатам како може некој ладнокрвно да пука во деца и три години слободно да шета, а никој ништо да не преземе? Се будам со неговиот лик, а најтешко ми е кога ќе излезам од порта и погледот ќе ми запре на кошот. Нема повеќе спокој и живот во Тетово за моето семејство -вели таа.
Задлабочена во последните подготовки за парастосот, кој ќе се одржи денеска на тетовските гробишта, вели дека таа, сопругот Веле и ќерката Симона бараат од државата да им помогне да ја продадат куќата и да се казни убиецот.
- Никој не сака да ни ја купи куќата. Знаејќи за трагедијата, ни нудат многу ниска цена. Чукнавме на многу врати, кај премиерот, претседателот на државата и кај јавниот обвинител за да ни помогнат, да ни најдат привремено сместување во Скопје, додека не ја продадеме куќата. Но, ништо од тоа.
Празно остана и ветувањето од кабинетот на Црвенковски дека некој спортски објект ќе го носи името на Ванчо. И пратеникот Зоран Томиќ никаде го нема, иако велеше дека ќе ни помогне. А, Ванчо, еден месец пред да го убијат, гласаше за него - се потсетува мајката разочарано.
Додека го уредува цвеќето пред кандилцето, кое постојано гори покрај кошот, низ солзи вели дека по убиството на Ванчо никој не стапнал на игралиштето. Дури годинава неговите другари Бојан, Михајло, Владе и Небојша почнале да играат кошарка.
- Тука и по три години е исто. Речиси секоја вечер кога поминуваат со возила пукаат пред кошот и пред куќата. Не вознемируваат и праќаат порака да си одиме. Се чувствуваме како злосторници, како ние да сме виновни - вели Весна.
Судскиот процес против Нухиу се очекува да почне месецов. Нему, најверојатно, ќе му се суди во отсуство, бидејќи не е достапен за органите на прогонот. Против него е распишана и потерница.
Нухиу во отсуство со две пресуди на Основниот суд во Тетово веќе е осуден на по 6 години затвор за две други кривични дела. Тетовското јавно обвинителство поднесе жалба за овие две судски пресуди барајќи да бидат преземени построги судски санкции против Нухиу.
ДНЕВНИК