Општествено штетни појави

[Димитар]

Кои појави би ги ставиле во групата на општествено штетни?

Врз основа на научни и логички анализи, како и историски податоци за организираноста на општеството, може да се тврди дека со формирањето на организираните облици на општествените заедници се појавува и феноменот на одбранбено-заштитната функција, кој може да се следи низ целиот општествен развиток, низ сите негови етапи. Заштитната функција во општеството се јавува како дел на општествената, државната функција и организација, со која се заштитуваат општествените добра и вредности кои претставуваат основа на конкретниот облик на општествено уредување.

Во организационен поглед заштитата се организира на начин кој обезбедува најголема сигурност на владеачките конкретно-историски општествени односи.

Ако правам една листа би ги наброил:

1. Криминал
2. Алкохолизмот кај младите
3. Наркоманијата
4. Самоубиството
5. Проституцијата и сексуалната изопаченост
6. Малолетничка деликвенција

Повеќе за сите - покасно...

 

[Димитар]

Криминалот како општествена појава

​

Младите како од шега пукаат, претепуваат сред бел ден, шверцуваат и препродаваат, провалуваат во станови, лажат на улици и што ли уште не. За ова не му се потребни посебни мотиви, стресови за да станат и ситни крадци, но и криминалци со големи дела пред се, дури и убијци. Забележливо е дека меѓу извршителите на тешки и провални кражби па дури и во вооружени престрелки, најчесто се уживатели на дрога кои преку кражбите обезбедуваат пари за купување на дрога. Криминалот се издвојува како посебна општествена појава и се јавува со појавата на класното општество. Неговата суштина се изразува преку девијантното однесување на индивидуата, односно како облик на конкретно однесување на поединецот кој се наоѓа во конфликт со важечките норми на однесување во дадената општествена заедница. Значи криминалитетот е тесно поврзан со личноста на извршителот на тие криминални постапки. Меѓутоа криминалитетот не е само поеднинечен настан врзан за личноста на деликвентот, туку тој во прв ред е општествена појава што егзистира во животот на оптшеството.


Криминалитетот како општествена и индивидуална појава произлегува од нивната поврзаност и нивното влијание и предизвикува негативни последици врз поединецит, врз општеството и неговите блага. Како негативна и штетна појава, во однос на социопатолошките појави тој се става на прво место според негативното влијание што го пројавува, како врз основните вредности и блага на нашето општество, така и врз личноста на нејзиниот интегритет. Во криминалитетот доаѓаат во израз кражбите, убиствата, телесните повреди, разбојништво, клевети, силувања, разни кривични дела, препродажба на опојни дроги и сл., но знаеме дека овие дела ги вршат уживачи на дроги, акутни алкохоличари, проститутки и др.


Во последниве децении криминалот се јавува и во посебна остра форма поради што станува и многу сериозен општествен проблем. При сето ова во некои работи знаеме дека сме сосема блиску до криминалците од другите соседни земји со долга криминалистичка традиција, но не треба да се потценува и начинот на кој се внесува и растура дрогата кај нас. Кризата е причина која предизвикува младите свесно да се опеределат и посегнат по дрогата.

 

[Димитар]

Алкохолизмот кај младите

Алкохолизмот како општествена појава има социопатолошки карактер и предизвикува физички, психолошки и социјални последици. Зависноста од алкохолот укажува на растројство во сферата на физичкото и психолошкото здравје проследено со економски и социјални последици. Личноста која е зависна од алкохол се нарекува - алкохоличар. Алкохолизмот претставува индикатор за условите и односите во кои што живее и работи човекот, а кој предизвикуаат промени кај личноста. Доколу зависноста од алкохолот е голема при што покажува отворени душевни растројства или болести кој што го зафаќаат неговото тело и здравје ги расипува неговите односи со други лица и ја доведуваат во прашање неговата економска благосостојба.

Алкохолот штетно дејствува врз организмот и неговите функции т.е. го уништува човекот, а преку тоа се остварува неговото влијание врз нервниот систем и психичкиот живот воопшто. Од влијанието на алкохолот се менува личноста на човекот, така што тој не може успешно да се вклопи во својата средина, со што не е способен да се грижи за себе, а уште помалку за другите. Тој не е способен за работа, не може да воспостави добри односи со другите луѓе, станува проблем во семејството, за колективот и за заедницата во целост, што предизвикува негово пропаѓање како личност. Со алкохолот човекот мисли дека ќе ги реши сите проблеми во својот тежок живот и овој проблем се среќава стотици години наназат.

Алкохолизмот во нашата земја не е доволно проучуван и продлабочен, но сепак во денешно време алкохолот зафаќа широки размери и во нашата земја. Масовната потрошувашка на алкохолот предизвикува големи штети во општеството. Пред се алкохолизмот е карактеристична појава за мажите, иако во некои поразвиени земји учеството на жената е поголемо. Потрошувачката на алкохолот зема се поголем замав, а забележани се и драстични случаеви кога деца на единаесетгодишна возраст земаат алкохол во поголеми количини. Значи причина која доведува до алкохолизмот може да биде тоа што од мали се привикнуваат на пиење на алкохолни пијалоци. Пред се мала е ползата од критиките кои родителите им ги даваат на своите потомци држејќи ја цигарата в рака и смирувајќи се со жесток пијалак.

 

[Димитар]

Наркоманијата како негативна појава

Многу одамна човекот ги запознал дрогите како лекови со благотворно дејство, но подоцна доаѓа и до нивна злоупотреба. Кога сме кај дрогата знаеме дека таа е моментално најраспространето уништувачко средство на здравјето на луѓето, било тоа да е лесна или тешка дрога. На патот без враќање зачекоруваат најчесто млади луѓе и тоа од различни мотиви: пред се од љубопитност, бегање од реалноста, влијание на социјалната средина, модата и.т.н. Онај кој ја користи дрогата живее доста пеколен живот и обично живот со краток век, но се појавува и желба за лекување од оваа опасна болест која зафаќа широки размери кај нас. Дрогата на почетокот ја зема здравиот човек, а подоцна дрогата го зема болниот човек. Од сите видови дрога хероинот е најраспространет, пред се во Македонија и во др. земји и се наоѓа многу лесно на некои добро познати пунктови и е поефтин за разлика од кокаинот. Во вакви случаи тој што сака да проба многу лесно би дошол до хероинот.

Благодарејќи им на добростоечките граѓани, дилерите т.е. зависниците од дрога и натаму уживаат во пеколот кој за нив претставува рај. Денес се преземаат доста мерки со цел да се запри ширењето на хероинската епидемија, но и покрај сите преземени мерки сепак дрогата по илегални канали доспева во нашата земја и за кратко време Македонија стана тло за трговија со дрога. При подолго земање на дрога т.е. во поголеми количини и подолго време тогаш се чувствува состојба на немоќ на општествено прифатлив начин да ги разрешува своите проблеми и да ги задоволува своите потреби, а со тоа да се најде самиот себеси во општеството, чиј општествено-економски, политички, социјален и културен развој се остварува низ крајно застарени противречности. Човекот во дрогата наоѓа средство за да избега во еден нерален свет. Дури и кога тој ќе стане зевисен од дрогата, кога таа ќе му стане неопходна, наводно за да ги совлада и реши проблемите, а со тоа да воспостави рамнотежа на личноста што веќе еднаш му е нарушена и тоа повеќе пати се повторува, може да се зборува за наркоманија.

Од медицински аспект повеќекратната употреба на дрога ја прави личноста зависна од неа пред се психолошки, а потоа и физички. На физички план дрогата дејствува разорно врз човечкиот организам, до таа мера што по долготрајно земање на дрога доаѓа до смрт. Најповеќе корисници се токму најмладите во циклусот на младоста и тоа деца од 14 годишна возраст. Доколку дрогата не се спречи за кратко време тогаш на нашата младина црно и се пишува, а без младина нема ни иднина како за младите така и за нашата земја. Во канџите на дрогата како што видовме многу лесно може да се најдат многумина средношколци и основци затоа што дилерите постојано се во близина на училиштата. Несомнено е дека дрогата т.е. наркоманијата станува се поголем проблем на денешницата и во таа смисла се бара широка општествена акција за нејзино спречување. Но покрај тоа што дрогата претставува општествено зло и во целост го разорува здравјето на младите, зависниците-наркомани се најголемите преносители на досега неизлечливата болест СИДА, што претставува светски проблем.

 

[BuSarCe]

овде се не е во ред,младиве се хаос се надевам дека ќе му дојде паметот и нема ни да користат многу алкохол,или ред други работи.

 

[Димитар]

Самоубиство како негативна појава

Самоубиствата се чинови каде човекот сам посегнува по својот живот и се смета за едно од најнеприфатливите човекови однесувања. Самоубиството е спротивен чин на човековата природа зошто тој се раѓа за да живее, да твори, да се усреќува, но не и да страда. Животот на човекот претставува борба со цел да создаде нови блага и вредности кои ќе го исполнуваат неговиот живот. За појава на самоубиство влијаат повеќе внатрешни и надворешни фактори, стресови и кризни ситуации.


Самоубиството е третирано како индивидуална и како општествена појава и претставува: свесно и намерно уништување на сопствениот живот и мора да постои способност да се донесе одлука за самоубиство, како и сознанија дека е животот полн со тешкотии и непредвидливи ситуации и дека смртта е средство што конечно го ослободува од нив. Чинот на самоубиство може да биде поттикнат од депресивна природа или од трајна душевна растроеност. Факт е дека овој трагичен чин е поврзан или се јавува со неразрешливи услови и состојби во животот на човекот. На самоубиството му претходат социолошки, психолошки и психопатолошки карактер и еден од нив може да биде повод за самоубиство. Тоа е карактеристично за мажите пред се за лицата од 45 до 60 години, а обидите за самоубиство за лица од 20 до 40 години. Во целина овие податоци покажуваат дека средината во која се живее и во која трајно се остваруваат животните активности, претставува место и простор каде се развива личноста, но се остварува и самиот чин на самоубиство.

 

[tha CaspeR]

А бе све ОК, само што јас зимање на лесни дроги и проституција не сметам воопшто како штетна појава... :S

гласав за криминал...

 

[Lady]

Најдевијантно општествено однесување е малолетничката деликвенција

 

[Чекич]

maloletna delikvencija definitifno. kopiljacive ne se tepani kako sto treba.

 

[Димитар]

Проституцијата и сексуалната изопаченост

Проституцијата е една од најстарите проблеми на општеството. По својата природа таа претставува општествено-негативна појава, што остава траги и последици како врз општествените односи така и врз индивидуата. Од сексуалната авантура не е лоша само појавата на разните неизлечливи болести туку и несаканата бременост. Со минимални предзнаења, неискусни, неподготвени, психолошки недозреани, физички неразвиени, без родителска контрола и грижа младите мошне рано стапуваат во полови односи. Несаканата бременост, прерани бракови без љубов и проституцијата се стапици што ги демнат пред се младите, а во која од нив ќе паднат и ќе се фатат најчесто не зависи од нив самите туку од сплетот на нештата врз кои, за жал, не можат многу да влијаат. Со сите овие проблеми се среќаваат младите луѓе пред се девојчиња од 15 до 20 години. Тие најчесто тргуваат со своето тело и во најголем број се наркомани, кои немајќи пари за дрога го продаваат своето тело за пари. Од многуте стапици во кои што младите можат да паднат најопасна е проституцијата што некогаш може да биде и ,,река без враќање”.

Бројот на оние кои се занимаваат со проституција е во пораст, а пред се значаен е растежот на малолетничката проституција која завзема загрижувачки размери. Протитуцијата се смета за еден од најстарите занаети во светот каде најбројни се млади девојки, убави, образовани, кои едноставно сакаат слободно да живеат лесно заработувајќи за добра, модерна и скапа облека, станови, скапи автомобили и сл. Како што не можеме да го избришеме криминалитетот во целиот свет така не можеме да ја отстраниме и проституцијата. Како и криминалитетот, така и таа е само дел од лошата општествена состојба, бидејќи таа им задава удар на домот и на семејството, раѓа лаги и недоверба, а со тоа ги понижува и урива брачните односи. Пред се проституцијата го поттикнува младиот човек на злосторство и антисоцијално однесување. Познато е дека проституцијата вршејќи го својот ,,занает” се движи во кругот на тешки криминалци, алкохоличари, наркомани и притоа и самата се впушта во тие недозволени криминални однесувања. Затоа, проституцијата често се поврзува со разни кражби, убиства со сексуални мотиви, силувања и многу други кривични дела што го тера младиот човек на пропаст. Тој станува опасен за општеството, па затоа општеството го прогонува и го казнува.

Исто така, одредени податоци покажуваат дека поголем дел од проститутките доста рано ја почнале својата кариера, а поради тоа не успеале да стекнат нужни образовни квалификации. Според сето ова, може да се заклучи дека проституцијата како масовна општествена, но и индивидуална појава претставува мошне штетна појава и е во поголем пораст кај нас.

 

[Димитар]

Малолетничка деликвенција

​

Малолетничката деликвенција по нејзиниот карактер претставува криминално недозволено поведение на малолетник. Овој вид криминал има свои специфичности бидејќи него го вршат психички недозреани личности, кои на кривичните дела оставаат специфични белези и имаат специфично кривичен правен третман. Како малолетни, се сметаат помлади малолетни лица од 12 до 14 години, малолетници од 14 до 16 години и постари малолетници од 16 до 18 години.

Од кривичните дела кои ги вршат малолетниците на прво место се имотните деликвенти. Овој вид криминалитет е во постојан пораст. На второ место се т.н. безмислени кражби како што се недозволено позајмување на возила. Во оваа категорија се и сексуалните деликвенти како израз на неконтролирана изопаченост, застранување на одделни младинци и блуд. Одма зад овие доаѓаат кривичните дела од: сообраќајот, убиства, закани за убиства, нанесување на повреди, фалсификати, непристојни испади на жени и девојки. Мошне е голема опасноста кај кривичните дела извршени од малолетници. Се јавува силно насилништво што допира до вандализам. Посебно загрижува порастот на криминалот што го вршат дружините, банди, гангстери. Во овие банди постои утврдена хиерархија и ред кој мора да го почитуваат членовите на бандата. Тие вообичаено вршат недозволени работи кои се забранети во семејството и училиштето. Секој член на бандата во неа наоѓа замена за семејството и средината во која што живее. Бандите се полни со лица кои имаат нестабилни семејствa, но и како членови на бандите се и галеничиња на определени слоеви на општеството.

Системот на една држава треба секогаш да биде во извесна смисла изграден на начин кој ќе биде поволен за државјаните во таа држава, а исто така општеството кое владее треба да биде прифатливо. Но, сакале или не, без разлика на системот или општеството мораме да се соочиме со некои проблеми од сериозен вид. како што е малолетничката деликвенција. Но сепак тие начини на однесување и живот на малолетниците, не значи дека секогаш потекнуваат од општеството, тоа може да биде и од друг вид.

Малолетничката деликвенција всушност е појава која влијае и на изградбата на системот и развитокот на општеството, но и на нормалниот живот на одредени семејства. Оваа негативна појава може да се објасни од многу гледни точки. Прво, раздвојување на семејството од аспект на егзистенцијален проблем, развод помеѓу брачните парови од овој или оној проблем. Децата на тие семејства мора да бидат на некој начин згрижени, но никогаш така згрижени како што можат да бидат меѓу своите најблиски.

Секојдневниот проблем со егзистенција доведува до ситуација кога децата незнаејќи како да се снајдат и несакајќи да бидат помали, се фрлаат на кражби, убиства, малтретирања на поедини лица и.т.н. веројатно за да го изнесат својот бес или да најдат начин да преживеат, што во никој случај не може да биде оправдано. Другите групи на малолетници - напуштени деца, воопшто не можат да го водат нормално својот живот, затоа што никој не се грижи за нив и никој не посветил време за нивното воспитување и љубов. Така тие сметајќи дека тоа е нормално, често крадат, се дрогираат, пијат, па дури и убиваат сметајќи дека за тоа се способни и дека тоа е начин на нормален живот.

Тоа многу делува на нормалниот свет и голем ризик претставува и за други малолетници кои што се задоволени од сé и можат да потпаднат под влијание на првата група. Оваа појава во никој случај не може да се оправда и мора да се најде начин за спречување, затоа што младиот свет сепак е иднина и надеж на секоја држава.

 

[кики]

Не би можела да направам некоја табела во која секоја од овие општествено штетни појави би имала свој редослед. Секоја од нив е подеднакво штетна за поединецот во општеството исто како што секоја од нив по себе провлекува и друга исто така штетна појава.

Сепак на прво место би ја издвоила и би и придала најголемо значење на малолетничката деликвенција. Од тоа започнува се што потоа следи во животот на еден млад човек, ако тоа може и да се нарече живот. Оваа појава следствено си ги влече по себе и алкохолизмот и наркоманијата, сексуалната изопаченост...

 

[mRnO]

Сите се општествено штетни

 

[vlatkolik]

Апсолутно сите овие се општествено штетни,една влече кон друга,но еве да речеме како почеток на се може да се стави малолетничката деликвенција-> криминал-> проституција и сексуална изопаченост-> алкохолизмот-> наркоманија-> самоубиство

 

[Mad Maxx]

Алкохолизмот и самоубиството би ги сврстил во личен избор,никој никого не може да натера да стане алкос или да се офф-не.Наркоманијата доаѓа нешто ко природна селекција а остатокот е чист криминал.Еден добар цитат "Све то треба побити".