ште еден голем грабеж на поштенско возило во скопски Чаир. Случајно или не, наместо кај пензионерите, парите од „Пошта“ завршија кај неколку маскирани и вооружени разбојници. Молк од „Пошта“ колку пари се украдени. Од четворицата кои ги носеа поштенските пари, еден се бори за живот. Јоле Ѓурчиновски со неколку прострелни рани е во животна опасност.
„Кај ова лице се работи за тешка телесна повреда, со загрозување на животот и лицето е хоспитализирано на Клиниката за анестезија, реанимација и интензивно лекување“, изјави Соња Стошиќ, портпарол на Ургентен центар.
Со него се пренесени и 36-годишниот Игор Трајановски и 44-годишниот Фадиљ Лесковица. И тие и возачот на поштенското комбе Игор Палиќ, кој е во Градската болница, се надвор од животна опасност.
„Огнострелна рана во предел на левото рамо. Пациентот е опериран, се наоѓа вон животна опасност“, рече Виктор Камиловски, директор на Градска болница.
Патот на поштенското возило му го попречија разбојници во скопски Чаир, од едната страна со црно „Алфа Ромео“, а од назад со „Форд Мондео“.
Откако го принудиле да запре, почнале да пукаат со автоматско оружје во „Шкодата Фелиција“, со која четворицата вработени во „Македонска пошта“ ги разнесуваа парите.
На огнот било возвратено, но и биле лесно совладани. Откако ги зеле вреќите со пари, едното возило го оставиле во Чаир, а подоцна и „Фордот“ со кој избегале во Гази Баба.
Од „Пошта“ не побарале полициска заштита за оваа пратка. Освен двајца во возилото, огромната сума пари ја обезбедувал и 42-годишниот Сашко Васков, кој ги следел со приватен скутер. Тој прв бил совладан со удар од едно од возилата.
Како разбојниците знаат за овие трансфери, допрва ќе се испитува, посебно внатре во „Македонска пошта“.
„Доколку се покаже дека тие лица имале каков било контакт со некои вработени од „Пошта“, коишто издавале доверливи информации околу транспортот на пари, ќе бидат преземени соодветни мерки“, вели Иво Котевски, портпарол на МВР.
Најголем грабеж досега беше во декември 2005 година. Тогаш од поштенското комбе во Шуто Оризари
беа украдени 600.000 евра. Разбојниците и парите никогаш не беа пронајдени.