Најдобриот кошаркар на Лос Анџелес Лејкерс за прв пат во кариерата е прогласен за МВП играч на НБА лигата.
После двете трети и двете четврти места Брајант стигнал до титулата која го заобиколувала и во сезоните кога освојувал титули со „езерџиите“ или кога бил најдобар стрелец на лигата, што е случај во последните две сезони.
Во секој случај, трофејот е сега во рацете на Коби, а го заработил со просек од 28.3 поени, 6.3 скока и 5.4 асистенции по натпревар, оставајќи ги позади себе Леброн Џејмс, Кевин Гарнет, Крис Пол и Амари Стадемаер.
Пресуден фактор е тоа што Брајант ги предводел Лејкерси до првото место во западната конференција во една од највозбудливите трки за плеј-оф позициите во историјата на лигата.
„Не бев сигурен дека ова ќе ми се случи во кариерата, но да доживееш вакво признание е нешто посебно, особено да го поделите со остатокот од екипата“, изјавил Брајант за „Лос Анџелес Тајмс“.
Коби не пропуштил ни еден од 82 натпревари во првенството иако во февруари му било соопштено дека мора да оди на операција на лигаментите на десната рака, тој одлучил тоа да го направи после Олимписките игри во Пекинг. Дејвид Штерн, комесарот на НБА лигата ќе му го врачи трофејот на Брајант пред вториот полуфинален натпревар на Западната конференција помеѓу Лејкерс и Јута во среда навечер
