МПЦ не се кае за продажбата на манастирот
Од МПЦ признаваат дека потпишале преддоговор со грчкиот газда на „Усје“ и сметаат дека не згрешиле
Народот нема да и' дозволи на МПЦ да го продаде манастирот и конаците на Грците, порачуваат револтирано селаните од Говрлево по завчерашната вест дека црквата за 200 илјади евра го продала манастирскиот комплекс кај селото на цементарницата „Усје“.
Според преддоговорот, меѓу МПЦ и „Усје“ се продаваат манастирот „Свети Трипун“, конаците и шест цркви, кои се протегаат на земјиштето со површина од 17.366 квадратни метри.
- Црквите и манастирот се стари и испукани од минирањето во каменоломот - е главниот аргумент на свештените лица за продажбата.
Жителите на Говрлево не се смируваат и покрај ветувањата на МПЦ дека цементарницата ќе изгради нов манастир на нова локација во Долно Соње. Тие не можат да се помират дека црквата решила да продаде манастир стар 600 години и земјиште со археолошка вредност.
Во знак на протест, селаните се организирале и собрале 350 потписи, а петицијата ќе ја достават до МПЦ. Велат дека одлуката на црквата ја сметаат за навреда и побарале средба со архиепископот г.г. Стефан за да ја спречат скандалозната продажба.
Апостол Георгиевски, претседател на манастирскиот одбор на свештениците од МПЦ, им рекол дека никогаш нема да го стави својот потпис на договорот за продажба.
- Нас, селаните, никој не не' праша ништо. Јас се сретнав со секретарот на скопската епархија, прота Коста Станоевски и му кажав дека народот не дава да се сели манастирот. Не знам дали ме разбрал, но еве што станува - вели 80-годишниот Георгиевски.
Селаните велат дека имаат голема поддршка и од околните села.
- Ќе речете не се од нашата вера, но ете имаме подршка и од Албанците од соседното село Света Петка. И тие останаа вчудовидени од однесувањето на свештените лица на МПЦ да продаваат вакавски места -вели Благоја Стефковски, жител на Говрлево.
Неговиот сосед Милан Ѓурески вели дека селаните се сомневаат во зделката. Според него, пред некој месец луѓе од МПЦ дошле во селото и ги убедувале селаните дека Грците нема да ги уриваат манастирот и старите цркви, туку ќе изградат нов манастир во Долно Соње.
- Верувам дека Грците, кои се газди на „Усје“, нема да го урнат манастирот и црквите, бидејќи тие се религиозен народ, а во исто време и многу суеверни. Но, каква е тогаш логиката да го купуваат ова земјиште ако не мислат да уриваат и да градат? Нешто не е во ред во целава работа - вели Ѓурески.
Прота Коста Станоевски, кој учествува во преговорите и е потписник на преддоговорот, тврди дека земјиштето се' уште не е продадено и дека се водат разговори за деталите. Не смета дека МПЦ направила грешка со намерата да го продаде комплексот.
- И кога се градеше браната „Козјак“ беа дислоцирани три цркви. МПЦ смета дека нема ништо спорно ако се продаде овој стар комплекс. Подобро тоа отколку да го оставиме да пропаѓа. Најбитно е што цементарницата „Усје“ зема обврска да изгради нов манастир и конаци во Соње - изјави прота Станоевски.
Слично како него размислува и монахињата Павлина, која со децении живее во манастирот „Свети Трипун“.
- Не е наше да решаваме, Господ ќе реши. Но, мене не ми е криво ако се продаде. Јас и понатаму ќе живеам во манастир, само во друг, со друго име - изјави монахињата Павлина, додека се докажуваше со мештаните кој колку е виновен за намерата манастирот да се продаде.
