Фондот Fenix Energy е новиот газда на Свидмилк
Новиот газда има големи планови за Сведмилк, а се споменува склучување на годишен договор со Армијата на САД вреден 35 милиони долари за доставување на млеко од Македонија
Американско-израелскиот инвестициски фонд Fenix Energy е новиот газда на Сведмилк. Млекарницата повеќе од шест месеци се наоѓа во тешка финансиска криза поради што престана да им исплаќа на фармерите за предаденото млеко - долг кој достигна околу четири милиони евра. Клучен за влезот на фондот беше вчерашниот ден кога потенцијалните инвеститори разговараа со банките на кои млекарницата им должи за репрограмирање на обврските во висина од околу 20 милиони евра. Во исчекување беа и фармерите кои решија закажаните протести да ги стават во мирување.
- Шведската млекарница ја купил израелски инвестициски фонд на кој прироритетно ќе му биде да ни ги исплати побарувањата - изјави Кире Небрежанец, сточар од Прилеп.
Тој додаде дека фармерите ќе ги актуелизираат протестите ако до 20 овој месец не им биде исплатен долгот за продаденото млеко на Сведмилк. Според информации на ВЕЧЕР, претставници на фармерите требаше доцна синоќа да се сретнат со новиот инвеститор за да ги информира за деталите околу исплатата на нивното млеко.
Според вицепремиерот, Зоран Ставрески, Владата иако не е акционер сепак се заложила за решавање на проблемот со неисплатеното млеко од Свидмилк.
-Настојуваме да помогнеме во изнаоѓање инвеститор кој ќе ја извлече млекарницата за во иднина да опстои и да им се платат долговите на фармерите. Ја следиме ситуацијата и се надеваме дека инвеститорите и банките што ја кредитирале млекарницата ќе најдат заедничко решение, а тоа ќе овозможи инвеститорот останатите средства да ги насочи кон фармерите зашто тоа е еден од условите млекарницата да продолжи со работа - рече Ставрески.
Како што дознаваме, новиот газда има големи планови за Сведмилк. Се споменува склучување на годишен договор со Армијата на САД вреден 35 милиони долари за доставување на млеко од Македонија.
На официјалната интернет страница на Fenix Energy стои дека се во завршни преговори со надлежните од Македонија за основање на фирма за извоз на овошје и зеленчук од земјата. ВЕЧЕР минатата недела објави дека надлежни од Fenix Energy USA LLC ја посетија Македонија.
- По неколкудневно набљудување на македонската агроиндустрија, одлучивме да одиме напред со нашите планови за инвестирање во земјата - стои на нивниот веб сајт.
Оттаму пренесуваат изјава на надлежни од фондот каде Македонците ги оценуваат како добар и вреден народ.
-Веруваме дека можеме да им помогнеме на фармерите во организација на извозот. Со технологијата, опремата и со знаење од Израел, можеме да ја доведеме Македонија да биде една од силните извозни земји во регионот - се вели на сајтот на фондот.
Fenix Energy USA LLC е приватна компанија со централа во САД. Велат дека имаат Joint Venture (JV) со компании низ целиот свет и претставништва низ САД, во Бразил, Велика Британија, Словачка, Унгарија, Русија, Среден Исток и Азискиот пацифик. Како што стои на нивниот веб сајт, на чело на нивното претставништво во Цирих е Насер Пацоли од познатата косовска фамилија бизнисмени.
Фондот нуди широк спектар на производи како што се: млеко во прав, сончогледово и палмино масло, ориз, жито (пченица), отпадоци од метал, користени шини, шеќер, цемент, јаглен, уреа и нафтени деривати.
Светлана БЛАЖЕВСКА
