МАРнет цвети, па уште кириличен домен ни фали... Нека се средат прво и да ја средат процедурата на регистрирање и трчаниците, па после да размислиме за .мкд или .македонија домен.
Македонија ќе го почека кириличниот домен
„Марнет“ сé уште е фокусиран на спроведувањето на новиот правилник за користење македонски домен, а домените на кирилично писмо ќе се стават на дневен ред идната година
Кириличниот домен Македонија ќе мора да го почека до наредната година. Македонската академска истражувачка мрежа „Марнет“ сé уште е фокусирана на спроведувањето на новиот правилник за користење македонски домен, додека домените на кирилично писмо се во втор план.
Србија завчера и се приклучи на Русија во употребата на интернационален, кириличен домен (.срб), а нив ќе ги следат Украина, која веќе го доби доменот (.укр), а во процедура е и барањето на Бугарија.
- Од 2009 година интернет-корпорацијата за доделени имиња и броеви (ИЦАНН) овозможи доделување интернационални домени, што значи дека секоја земја може да користи домен на официјалниот јазик, односно писмо што го употребува. Македонија уште тогаш ја почна постапката, во рамките на Министерството за информатичко општество, и ги врши сите подготовки за документацијата што е потребна. Документите се потребни за понатамошно исполнување на сите технички можности што се неопходни за одобрување интернационален домен. Русија веќе направи бум со побарувачката на домените (.рф) - вели Сашо Димитријоски, директор на „Марнет“.
Тој додава дека Македонија сигурно ќе добие интернационален домен во текот на 2012 година.
- Се подготвува целокупната документација, а во рамките на ИЦАНН веќе има македонски лобисти што притискаат за кириличен домен. Сепак, станува збор за долга процедура, а Србија чекаше повеќе од година за нејзино завршување. Постојат повеќе опции за тоа како ќе гласи доменот, а некои од нив се (.мкд) и (.македонија) - додава Димитријоски.
И од хостинг-компаниите се согласуваат дека кириличниот домен треба да почека подобри времиња. Тие сметаат дека во моменталното функционирање на „Марнет“ има простор за големи промени и оти предност треба им да се даде на онлајн-регистрацијата на домен и на соодветната поддршка на корисниците.
- Додека не се средат внатрешно, нема потреба од брзање за активација на кириличниот домен. Потребни се онлајн-нарачки, брзо и ефикасно ажурирање на домените и корисничка поддршка, со кои и корисниците ќе бидат позадоволни. Доделувањето кириличен домен, може да создаде дополнителни проблеми и забуна кај корисниците, пред сé, затоа што многумина не знаат да сменат кирилична поддршка на тастатурата, а со тоа и да го внесат доменот на кирилица во пребарувачот. Според бројот на моментални активни домени во Македонија не гледам голема потреба од регистрација и на кирилични домени - објаснува Иван Петрушевски од хостинг-компанијата „Мкхост“.
„Марнет“ во моментов работи според стариот правилник, кој во почетокот на годинава беше оспорен и предизвика затишје во функционирањето на македонскиот врвен домен (.мк).
- Новиот правилник е готов, но чекаме буџет за да ја обезбедиме техничката опрема што ќе ни биде потребна за негово спроведување. Значи без потребните технички решенија, „Марнет“ не може да ги спроведе сите активности што беа планирани, меѓу кои е и електронската регистрација на домен - објаснува Димитријоски.
Автор: Огнена Костова
Извор:
Нова Македонија