Бакојани: Сериозен акт е да попречуваш миротворна сила
Атина /04/06/ 16:17
Грција изразува уверување дека проблемот со грчкиот конвој ќе биде решен и оти грчките воени сили ќе може да минуваат низ територијата на Македонија.
Ова, денеска во Атина, го изјави шефот на грчката дипломатија Дора Бакојани како реакција на македонската забрана за премин на конвојот со грчки војници.
“Верувам дека сите во Скопје, и државното раководство, и покрај отсуство на влада во моментов, осознаваат колку сериозен акт е да попречиш една миротворна сила, чие присуство на Косово е неопходно“, изјави Бакојани.
Според македонското МНР, грчките војници, дел од контигентот на КФОР што вчера се обиделе да влезат во Македонија преку граничниот премин Богородица, имале несоодветна документација.
“Согласно СОФА договорот за движење на вакви контингенти, неопходен е НАТО патен налог и соодветна документација, при што вчера од нашите надлежни органи било утврдено дека војниците имале национални патни налози напишани на грчки јазик, а списокот на луѓе и опрема не одговарал на фактичката состојба“, изјави портпаролот на МНР Василе Андоновски.
Тој додаде дека висок претставник на македонското МНР во Брисел веќе ги информирал претставниците на НАТО за случајот.
“Со надлежните во НАТО е утврдено дека станува збор за непочитување на процедурата за влез во нашата држава. Оттаму за нас случајот, што воопшто не е случај, е завршен“, изјави Андоновски.
Македонските власти, на граничниот премин Богородица, вчера во 7 часот и 40 минути не им дозволиле на контигент на КФОР со грчки војници да ја поминат границата за влез во Република Македонија.
Грчките војници, по извршени консултации, решиле да се вратат назад во Грција, додаваат од македонското МНР.