Интернационалецот од Гана, Осеи Кофи, е најновото засилување од странство кое му се приклучи на најтрофејниот македонски клуб Вардар. Денеска потпиша 1,5 – годишен договор со „црвено-црните“ и му се придружи на словенечкиот голман Дејан Милиќ, кој претходно, како прва ластовичка, пристигна среде зима на арената „Филип Втори“.
Она што е најважно, и двајцата знаат дека потпишале за најдоброто од Македонија, ФК Вардар, и дека треба епитетот на засилување да го оправдаат со добри игри во наредниот период..
„Среќен сум што доаѓам во Вардар. Знам дека тоа е најдобриот фудбалски клуб во Македонија и дека минатата година ја освои шампионската титула. Се надеваме дека ќе дадам полн придонес во освојувањето на новите трофеи, веќе оваа сезона“, изјави Осеи Кофи, офанзивниот играч за врска од Гана, кој од денеска е нов член на Вардар.
Дејан Милиќ, словенечкиот голман, веќе неколку денови е тука, треба да биде засилување на голманската позиција, односно да ја зголеми конкуренцијата меѓу диреците.
„Вардар е голем клуб уште од деновите на поранешна Југославија. Добро знам каде дојдов, се надевам дека ќе продолжиме со добри игри и успеси и во периодот што следи“, истакнува и Милиќ.
Кофи Осеи и Гуобадија Оса
Дејан Милиќ и Горан Симов
Интересно е дека и двајцата веќе имаат свои „тутори’ во клубот, односно староседелци, кои треба да им ги олеснат првите денови во ФК Вардар. Осеи Кофи, кој допатува денеска, веќе е во друштво на Ајскрим Гуобадиа Оса, додека Милиќ најмногу засега се дружи со искусниот голман Горан Симов.
Третото засилување е Димитрија Лазаревски. Тој се врати од Казахстан, ги почна подготовките со Работнички, но одлучи сепак да потпише договор со Вардар.
Тренерот Никола Илиевски Џиџи е задоволен од ангажманот на новите фудбалери, верува дека се тоа квалитетни засилувања за тимот на Вардар, а се надева дека ростерот ќе се докомплетира со уште неколку нови лица.
„Веќе напоменав и при моето претставување, дека ќе се залагам новите фудбалери во Вардар да бидат навистина засилувања за тимот. Голманот Милиќ дојде прв, тој е квалитетен чувар на мрежата, искусен и верувам дека ќе биде засилување за голманската позиција. Во ситуација кога Костадин Захов е опериран и се уште се опоравува, Милиќ ќе биде прв голман, секако тука е и искусниот Горан Симов, кој секогаш е тука, подготвен да помогне. Кога Захов наполно ќе заздрави, секако дека и тој ќе добие шанса да се докаже, а најдобриот ќе ја добие довербата да биде меѓу диреците“, вели Никола Илиевски.
Тој го најавува Осеи Кофи, како вистинско засилување во средниот ред и во нападот.
„Брз, експлозивен, со одлична техника, креатор, асистент и добар реализатор. Го имам следено, се работи за искусен фудбалер кој ја минал младинската школа на Хамбургер, а потоа бил и во Андерлехт, од каде бил отстапен да игра во Втората лига на Белгија. Верувам дека ќе биде големо засилување за тимот, токму онаму каде што ни недостига, еден спој меѓу средниот ред и нападот“, истакнува Џиџи.
За Димитрија Лазаревски не е потребно поголемо претставување, затоа што добро и е познат на македонската фудбалска јавност. Но, Илиевски сака да каже и за него неколку зборови.
„Лазаревски е искусен и проверен фудбалер, наш интернационалец, кој играше во Албанија, во Казахстан, играч кој може да се приспособи на неколку позиции во одбраната. Ќе ни донесе и квалитет и искуство, но и рутина која е повеќе од потребна за освојување на трофеи“, истакнува тренерот на Вардар.
за изјавата на Џиџи за Кофи
Кој те лажел Џиџи
Тоа што играл пред 8 години во јуниорите на Хамбургер не значи дека ја поминал нивната школа. Никогаш нема играно во Андерлехт бабини деветини се тоа.
Кој го тераше да се истрчува со изјавата за ЛЕ, па ќе ангажирал само фудбалери со проверен квалитет подобри од оние што смне ги имале
