Тепачка Вајс - Милушев!!!
* Сe се случувало пред некој ден по тренингот, кога за време на ручекот двајцата си размениле неколку удари. Најверојатно, само Милушев ќе добие "отказ"
Покрај тоа што не може никако да забележи една победа во првенството, Металург пред неколку денови се соочи со уште еден, голем проблем. По сe изгледа фудбалерите нервозни од сите случувања во и околу екипата, почнуваат и непотребно меѓусебно физички да се пресметуваат, дополнително нарушувајќи ја и така "разнишаната" атмосфера во таборот на "металурзите".
За што станува збор? Како што успеавме да дознаеме, на еден од ручеците по тренингот капитенот на "железарците", Мирослав Вајс, имал прво вербална расправија со левиот бек Александар Милушев која прераснала во физичка пресметка меѓу двајцата. Епилог на сево ова е мала расекотина на главата, а причината немала никаква врска со фудбалот.
Скопската чаршија веќе наголемо зборува за овој инцидент, особено симпатизерите на овој тим. Коментираат дека ситуацијата е крајно напната и полека губат надеж дека Металург ќе биде на врвот оваа сезона, особено по една ваква недисциплина каква што владее во тимот од "Железарница".
А за овој инцидент и двајцата фудбалери се однесуваа како да ништо не се случува, и дека сe е в ред. Откако дознавме во текот на завчерашниот ден, веднаш ги контактиравме, но очекувано, двајцата негираа за овој немил настан.
"Каков инцидент? Нема ништо сe е в ред", коментираше Вајс, а исто така и неговиот "другар" Милушев, кој рече дека не знае за никаква тепачка.
"Не, немаше никаков инцидент. Првпат слушам", истакна и Милушев кој, како што дознавме, за ова ќе заработи "отказ" од таборот на "зелено-белите".
Колку и да негираат, сепак, низ улиците на нашиот главен град уште пред два дена се зборува за овој инцидент. Причината била многу бизарна, и дека по завршување на ручекот Милушев го прашал капитенот дали оние кои завршиле со јадењето можат да си заминат, по што Вајс му одговорил многу невкусно, и почнала мешаницата по која Вајс прво го удрил Милушев, а овој му возвратил со иста мера, по што веднаш станале сите фудбалери и ја прекинале тепчката. И покрај обидот да не биде објавуван во јавноста овој инцидент, сепак, за истиот знаевме и многу порано, но сакајќи да бидеме сигурни дали навистина имало удар или само вербална расправија, а откако луѓе блиски до екипата н$ информираа дека не било само "размена на зборови" туку имало и физичка пресметка, стана јасно дека инцидент, сепак, имало и покрај обидот да се прикаже дека атмосферата во екипата е одлична.
Исто така се шпекулира дека за овој немил настан "подебелиот" крај ќе го извлече Милушев, кој според наши информации е на излезна врата од Металург, додека капитенот Вајс ќе "помине" само со суспензија.
По сe изгледа тренерот Ѓоре Јовановски нема контрола на однесувањето на неговите играчи. Ова е дополнителен проблем за него, откако во првите пет кола никако не може да забележи една победа во првенството, сега треба и да ја враќа и така нарушената атмосфера. А мечот со Македонија ЃП наближува, Ѓоре Јовановски и неговите играчи ги трошат последните кредити кај раководството на Металург. Мора да се почне да се победува, за враќање на самодовербата кај играчите, и барем малку насмевки на намуртените лица на "металурзите".
Не можеше да се сокрие
Тренерот на Металург, Ѓоре Јовановски, со закана кон своите играчи, "овој инцидент не смеат да го дознаат медиумите". Меѓутоа, и покрај неговите обиди, сепак, не успеа да се сокрие. Ѓоре, за овој инцидент знаевме уште истиот ден, но сакавме да бидеме сигурни дека имало тепачка. А откако сите во градот зборуваат за инцидентот, стана јасно дека дошло до физичка пресметка. Едноставно и покрај обидите, ова не можеше да биде скриено.
За Ѓоре ова и не е прв инцидент. Тоа е човек кој важи за многу авторитативен, но се покажува дека нема контрола на однесувањето на неговите фудбалери. Имаше проблеми во Работнички (еден од нив е оној во Базел кога Игњатов остана без капитенската лента), но и во репрезентацијата кога се скара со Христов и со тогашниот капитен Тони Мицевски.
Штериев и Стојановски не се повеќе во Металург
На сред сезоната и серија откази во раководството на Металург. Имено, од неразбирливи причини од екипата се "отстранети" и генералниот секретар Атанас Штериев, како и техничкиот секретар Никола Стојановски. Пред неколку месеци исто така отказ доби и претседателот Дамјан Стојановски, а и повеќемина фудбалери кои тогаш го носеа дресот на "железарците".
.
