Јунајтед повторно е прв фаворит за титулата
Без разлика на моменталниот изглед на премиерлигашката табела, Манчестер Јунајтед сепак и натаму останува најголем фаворит за титулата во Премиер-лигата.
Следејќи ја историјата на настаните во Премиерлигата во последната деценија, "ѓаволите" можат слободно да се потпрат на искуството и да кажат дека заостанувањето зад лидерите не е доволно големо за тие уште пред Божиќ да бидат отпишани од трката за титулата.
Во моментов Ливерпул е на чело на табелата. Има само еден бод предност во однос на "сините" од Лондон, а дури 6 во одност на шампионот, кој досега има и меч помалку во однос на првопласираните две екипи. Арсенал и во најлоша форма и период за клубот, секогаш е во чекор со најдобрите, па "топчиите" на Венгер моментно се четврти. Во англиските медиуми, стручњаците почнаа со свои анализи: што би било, кога би било?
Едно прашање може дури и да помогне во нелогичната битка за првото место во Премиерлигата. Многумина се сеќаваат сезоната 1999/2000 во која Арсенал беше на чекор до титулата, но на крајот остана со празни раце. Тогаш Арсенал загуби од тим, кој во годините потоа падна дури во четвртата англиска дивизија. Истата сезона друг фаворит за титулата не го издржа товарот на дерби средбите и ги загуби сите со екипите од врвот, свои главни конкуренти за трофејот. Такво нешто сега му се случува на Челзи. Во таа сезона, имаше и период во кој Манчестер Ј. цели 26 дена немаше првенствен меч, затоа што беше на светското клупско првенство во Бразил, но затоа кога се врати, победи се пред себе и ја освои титулата и тоа на крајот со 18 бода предност пред вториот на табелата.
Јунајтед и годинава има сличен распоред. Повторно има пауза во периодот од 11 до 21 декември, затоа што оди на светското клупско првенство во Јапонија. Во 2000 година, Арсен Венгер обвини дека календарот бил правен за да му помогне на Манчестер Ј. во битката за трофејот. Прашање е како ќе биде овој пат и дали шампионот може да се послужи со истото сценарио од пред девет години за повторно да дојде до освојување на титулата во Премиерлигата. Стручњаците се повикуваат на оваа сезона 1999/00, затоа што во многу нешта наликува на актуелната. Гледајќи дека до овој момент Челзи освои само 1 бод од трите меча со големите ривали (Лидс во споменатата сезона не освои ниту бод со ривалите и на крајот беше трет), а Арсенал загуби од тим како Хул, кој е налик на Братфорд од таа 1999/00 кој подоцна заврши во Лига 2, работите некако повторно доаѓаат до ситуацијата во Премиерлигата забележана пред 8 години. Но во целата оваа историја, стручњаците седнаа и ги измерија шансите на клубовите од главната четворка.
Манчестер Ј.
Се уште е фаворит бр. 1 за титулата. Иако има негатива од шест бода во однос на Ливерпул, има средба помалку и тоа со Фулам по што разликата би требало да се намали на само 3 бода. Во последно време игра многу подобро, постабилно и со повеќе елан. Се чувствува значително подобрување во формата, откако го победи градскиот ривал Сити затоа што по поразот од Арсенал и ремито со Астон Вила, тимот имаше голм пад во играта и резултатите. Според стручњаците, патувањето на Манчестер Ј. во Јапонија и овој пат може да се покаже како клучно во нивниот атак на трофејот. Црвените ѓаволи ќе отсуствуваат 10 дена во кои ќе патуваат и ќе играат на интерконтиненталниот куп. Идеалното сценарио за тимот на Фергусон е Ливерпул и Челзи да загубат на средбите кои ги играат во тој период (Ливерпул игра со Хул и Арсенал, а Челзи со Вест Хем и Евертон), а Јунајтед по Јапонија да се врати посилен во лигата. Не е невозможно да се очекуваат изненадувања на водечката двојка, особено на оние гостувања против Арсенал, односно Евертон, иако и дуелите со првоспоменатите екипи на домашен терен не им се сигурни, доколку не покажат вистинска сила за ги добијат ривалите.
Неспорно, Манчестер Ј. го има најдобриот состав во Премиерлигата, затоа што купува секогаш од најдобрите играчи. Фергусон и овој пат го плашат повредите, зошто сценарио налик на она што му се случува во моментов на Реал во Шпанија, може значително да го стави Манчестер Ј. во подредена положба во битката со моменталните "фронтмени" на табелата.
Прогноза: Прво место, без многу напор.
Челзи
Колку и да се обидува Луис Фелипе Сколари да го направи тимот подобар и да прикажува подобри фудбалски партии од меч во меч, факт е дека тимот не е на нивото од 2005 и 2006 година кога двапати едноподруго беше шампион. Во 2004/05, на пример, Демјан Даф и Арјен Робен беа толку опасни по крилните позиции, што не се споредуваат со сегашната игра и квалитет на Малуда и Џо Кол. Оби Микел не е ни до колена на претходникот Клод Макелеле, а освен тоа, повредите ги ставија во втор план и Карваљо, Есиен, па и Џо Кол, додека најдобриот напаѓач Дрогба, само што се врати од повредата, доби суспензија.
Во моментов Челзи нема голем избор во нападот. Некогаш како замена го имаше Гудјонсен, фудбалер кој беше мајстор за разбивање на противничките "бункери", игра која против Челзи ја применуваат 80% од клубовите кои гостуваат на "Стемфорд Бриџ".
Прогноза: Второ место и најава за многу промени следното лето.
Ливерпул
Еден момент од последниот натпревар против Вест Хем доволно зборува за состојбата и формата на тимот. Имено, резервистот Давид Нгог, кога се појави крај аут линијата, а четвртиот судија покажа на таблата кој треба да го напушти теренот за Нгог да влезе во игра, Роби Кин промрморе: "Па тоа сум јас". И беше во право.
Кога напаѓач платен цели 20 милиони евра му го отстапува своето место во меч при резултат 0:0 на некое младо момче што во ПСЖ минатата сезона постигнало 2-3 гола, јасно е дека работата во екипата не оди на добро. Кин е само уште еден фудбалер кој влезе во конфликт со менаџерот Бенитез. Историјата почна со Мајкл Овен, продолжи со Џибрил Сисе, Питер Крауч, па донекаде и со Дирк Кујт.
Основниот проблем на Ливерпул е како да се постигне гол. Тоа се забележа добро и на средбата со Фулам и на дуелот со Вест Хем. Уште поголема е слабоста на Бенитез да знае како да извади максимум од напаѓачите кои не се Фернандо Торес.
Ливерпул секако е кандидат за титулата како и Манчестер Ј. и Челзи, но кога Торес не е во игра, Ливерпул е само еден просечен премиерлигаш.
Прогноза: Трето место, а Бенитез ќе мора да си најде нови оправдувања.
Арсенал
Во 2000 година, Арсен Венгер требаше да ја стегне одбраната и да го направи Тиери Анри крилен напаѓач за да успее во експериментите со екипата. Сега одбраната продолжува да му создава проблеми, но не се знае дали може да најде добро решение, макар и на полусезоната.
Ако го реши овој проблем, можеби и има мали шанси за прогрес до крајот на сезоната. Ианку, и оваа година ништо повеќе од четвртата позиција не би било изненадување за "топчиите".
Прогноза: Четврто место, но како и секогаш со големи надежи за иднината.
