Невидено поигрување: Срамниот однос на Белгијците поддржан и од делегатот на УЕФА
Најмалку што може да се каже за условите на кои наидоа македонските репрезентативци изминативе два подгототвителни дена во Брисел пред денешниот квалификациски дуел со Белгија е крајна непрофесионалност. Односот на Белгиската фудбалска федерација која на крајот забрани и официјалниот тренинг, нешто што е задолжително според правилата на УЕФА, да биде на стадионот „Крал Бодуин“ каде вечерва од 20:45 часот ќе се игра натпреварот, е дефинитивно срамен.
Но, на сето тоа изненадувачки за нашиот табор на неколку часа пред дуелот беше сознанието што и официјалниот делегат на УЕФА за средбата сето тоа го аминувал поддржувајќи ги Белгијците кои на нашите фудбалери им сервираа можност да тренираат по разно-разни селски теренчиња, наводно штитејќи го теренот за официјалниот дуел.
„Теренот не смее да се уништува кога има вонредни ситуации“ – било образложението од делегатот.
А, овде во Брисел најмалку што има е вонредна ситуација. Нема ниту „С“ од снег. Два дена сонце е надвиснато над Брисел со очекувани квалитетни услови за игра.
Факт е дека задкулисните игри, провокациите кон нашиот национален тим се умешните игри на Белгијците, чии новинарски екипи си дозволија и да ги шпиунираат нашите тренинзи и покрај правилата за 15-минутно дозволено снимање.
„Не сум лут. Но нема потреба да давам изјави. Зарем за вас ова се нормални услови за тренинг?“ – им се обрати македонскиот селектор на белгиските новинари кои побараа од него образложение зошто ја откажа прес-конференцијата. Јаневски, на Белгијците кои го нарекуваат „половина свој“ им врати барем на тој начин.
Како и да е, сето ова може да биде само дополнителен поттик за нашите момци пред преполниот „Крал Бодуин“ на терен да им покажат на Белгијците дека некогаш силата може да предизвика само контра ефект. Време е за одмазда!