Фени потешко од очекувањата
Бранителот на титулата Фени индустри се намачи во двобојот со Вардар, но на крајот славеше со 89-73 и обезбеди пласман во полуфиналето
Кавадарчани во натпреварот влегоа опуштено, па така по првите дваесет минути мечот беше егал 43-45.
Третата четвртина избраниците на Емил Рајковиќ одиграа поангажирано, ја добија со 24-13, остварија двоцифрена предност која успеаја да ја задржат до крајот на натпреварот.
Најистакнати поединци во тимот на Фени беа Доналд Кол со 28 поени, вториот Американец Талик Браун оствари 22, а Златко Гоцевски придодаде 16 коша.
Можеби причина за поразот на младиот тим на Вардар беше и повредата на центарот Кирил Николовски, кој поради повреда на левиот глужд мораше да го напушти теренот и неиграше во второто полувреме.
Бојан Крстевски со 20 коша го предводеше „црвено-црниот“ тим.
Фени за противник во полуфиналето ќе го има победникот од мечот Амак СП-МЗТ Скопје.
„Одигравме онолку колку што беше потребно за да победиме. Се обидовме да ги зачуваме силите, па кошаркарите влегоа малку порелаксирано во мечот, но во вториот дел уфрливме во поголема брзина, па заслужено триумфиравме“, рече тренерот на Фени Индустри, Емил Рајковиќ.
„Купот е натпреварување во кој секогаш има изненадување. Ние не го дозволивме тоа, иако во натпреварот влеговме опуштено, но во второто полувреме со ангажирана игра се си дојде на свое место“, кажа бекот на бранителот на титулата, Горан Самарџиев.
„Неискуството е една од причините за поразот. Првите 20 минути ги одигравме одлично, а во третиот период нагло паднавме, што беше решавачки за конечниот исход. Оваа екипа повторно покажа дека има светла иднина“, изјави по натпреварот, тренерот на Вардар, Панче Милевски.
lee:feni-vardar -89-73 
