Тасевски: Сега ќе се бориме за европски рејтинг
Металург подготовките ќе ги почне на 31 мај и по еден месец ќе дебитира во куповите на УЕФА
Целта ја остваривме. Тоа што беше планирано го исполнивме и самиот излез во Европа е голем мотив за сите во клубот, вели Жикица Тасевски, тренерот на скопски Металург, еден од четирите македонски претставници во Европа.
Металург нема многу време за одмор, само 12 дена, па моторите за новата сезона ќе се запалат веќе на 31 мај, точно еден месец до дебито на меѓународна сцена. Откако се направија реформите во европските натпреварувања, а Интертото-купот се претопи во квалификациска рунда за Европската лига, почетокот на новата европска сезона е закажан за 29 и 30 јуни за квалификациите за Лигата на шампионите, а 1 јули за квалификациите за Европската лига, каде што ќе настапат металурзите.
- Нема многу време. Еден месец имаме од почетокот на подготовките до првиот меч. Тоа значи 22-23 дена за подготовки, затоа што последната недела не може да ги оптоварите фудбалерите и тие седум дена се само комплетна подготовка за првиот меч. Подготовките ќе ги одработиме во Македонија, по распоред како и зимоска, со тоа што сега ќе работиме во Маврово и во Охрид - вели Тасевски.
Во полусезоната, откако на кормилото е Тасевски, Металург е единствениот македонски клуб без пораз, а табеларно ако им се додадат и одземените бодови од пресметките со Победа, „железарците“ убедливо ја завршија полуетапата, во која примија само три гола, или вкупно пет сосе подготвителните мечеви во јануари и во февруари.
- Задоволни сме, затоа што пролетва бевме најдобри. Тимот имаше голем напредок, но може да оствари уште подобри резултати. Сега ни преостанува да се бориме за што подобар рејтинг на клубот во Европа. Морам да истакнам задоволство од условите што ни ги овозможи спонзорот - додаде Тасевски.
Гледаат млади таленти. Ѓоко може да направи некој трансфер накај исток.
