- Член од
- 3 ноември 2008
- Мислења
- 2.816
- Поени од реакции
- 1.088
Турција и Русија во битка за Македонија
Пан-славизмот и пан-османизмот на Балканот се прекршува над нашата држава, лоцирале нашите безбедносни служби и спроведуваат детална операција за откривање на финансиските текови, посебно на турските невладини организации во државава и нивните линкови со власта во Анкара. За разлика од Јасната намера на Русите на Балканот да направат граница со НАТО и ЕУ, македонските служби ги загрижува турската стратегија наречена ‘гео-култура’, со која ќе остварат свое влиЈание преку инфраструктурно и економско завладување со просторите што во минатото биле под Отоманската империја!
Во моментов на Балканот се случува судир на турските и руските интереси, а двете светски сили копјата ги кршат токму над Македонија, се вели во разузнавачките податоци до кои дојде ‘Публика’, а кои се поклопуваат и со општите светски проценки на врвните аналитичари.
Според шаховските потези на нивните лидери и истурените корпорации, Русите играат на картата на пан-славизмот и економски целат на освојување на просторите на Србија, Бугарија, Грција, Црна Гора, Република Српска, Косовска Митровица, Источна Македонија и јужниот дел на Албанија. Од друга страна, пак, со силни инвестиции во Босна и Херцеговина, Албанија, Косово, Санџак - дел од Србија каде живее мнозинско муслиманско население и Република Македонија, Турците спроведуваат пан-османизам на Балканот или стратегија т.н. гео-култура, како нов начин со кој треба да го остварат своето влијание во државите каде има муслимани.
За заштита од наплив на сомнителни инвестиции во државава, пак, според нашите сознанија, веќе се подготвува формирање посебна служба во рамките на Советот за безбедност на Македонија, која ќе работи исклучиво на детекција на заканата од економски тероризам насочен кон нас!
По посетата на рускиот премиер Владимир Путин на Белград, аналитичарите тврдат дека е јасно оти Србија во иднина целосно ќе зависи од руските пари, но и од политичките одлуки на Москва, ако се знае дека Србите веќе почнаа да го трошат рускиот кредит од 800 милиони долари. Олигархиската екипа на Путин од 2007 година ја поседува Нафтената индустрија на Србија (НИС), додека гасниот гигант ‘Гаспром’, кој го освојува пазарот во Бугарија (каде Русија е партнер и во изградбата на нуклеарната централа Белене), Романија и Грција, ќе пенетрира и кај нас преку проектот Јужен тек.
Бензинските пумпи во Република Српска исто така ги поседуваат Русите, кои таму, но и во Србија, веќе имаат концесија на најголем дел од рудниците. На сето ова, Турците возвраќаат со обидот преку телефонската компанија ‘Туркцел’ да го купат мнозинскиот пакет во ‘Телеком Србија’, додека во банкарскиот систем се одамна влезени во Бугарија, Србија, Босна и Албанија. Во Македонија, пак, одамна функционира ‘Зираат Банка’, а од неодамна, нов газда на Извозно-кредитната (ИК) банка е турската ‘Халк Банка’, која е седма по големина во својата земја.
Најголема борба меѓу Русија и Турција се очекува за рудните богатства на Косово и во Македонија, со оглед на тоа што во новоформираната држава на Балканот се наоѓа едно од најголемите наоѓалишта за јаглен и минерали (во близина на градот Обилиќ), а и кај нас им се интересни неколку ‘копови’, од кои секако најпознат е Алшар. Иако тивко, низ Македонија с` повеќе се шират и бензиските станици на руската ‘Лукоил’.
Загрижува линкот на ИХХ со исламскиот радикализам
Но, голем проблем за светот сега е планот на 15 мај да исплови втората флотила на Фондацијата за човекови права и слободи и хуманитарна помош (ИХХ) од Турција, за помош на Палестинците во појасот Газа, токму на годишнината од настанот кога израелските специјалци го нападнаа хуманитарниот брод ‘Мави мармара’ и убија осуммина од хуманитарците, а другите ги заробија. Турската невладина организација сега повторно организира конвој, па сите стравуваат од нови инциденти.
Она со што во овој случај е поврзана Македонија е моментот што и во втората флотила, како и лани, се очекува да има наши граѓани. Колку за потсетување, во првиот конвој минатата година имаше и тројца Македонци, меѓу кои, според проценките на македонските разузнавачки служби бил и лидерот на интелектуалното крило на македонските вехабисти, Јасмин Реџепи.
Според разузнавачките анализи до кои дојдовме, основна дејност на турската невладина организација ИХХ, контролирана од Партијата на правдата на премиерот Реџеп Таип Ердоган, е преку инфраструктурните инвестиции да ги спроведуваат турските интереси ширум светот. Тоа треба да го направат преку контрола на коридорите, концесии на патиштата и пристаништата, вложувања во енергетиката, контрола на токовите на енергенсите во државите и пристапните точки - аеродромите, но и на нафтата, гасот и основните извори на енергија, како што се гео-термалните води и соларната енергија. Ако е познато дека концесионер на скопскиот и охридскиот аеродром е турскиот ТАВ, тогаш нивните цели се јасни.
Најголемите економски акции на џинот од Босфорот на таргетираните простори почнуваат од Агенцијата за меѓународна соработка и развој на Турција или скратено ТИКА. Оваа владина агенција за врвна цел ја има токму стратегиската заштита на спомениците на териториите каде во минатото се простирала Османлиската империја, но и регионите во странските држави каде живеат Турци или домицилно население исламизирано од Османлиите. Наместо со употреба на оружје, воспоставувањето нео-отоманска империја, современа Турција на чело со исламистот Ердоган го спроведува преку проектот наречен ‘гео-култура’, односно инфраструктурно и економско завладување со просторите што се наоѓаат на зелената трансверзала. Поради можноста од исламски радикализам, пак, за македонските тајни служби влегувањето на турските компании во земјава станува загрижувачко.
--- надополнето ---
ТИКА инвестира во инфраструктура, образование, џамии
Според разузнавачките податоци, ТИКА е влезена во Македонија преку неколку проекти, пред с` во Западна Македонија и во општината Боговиње, каде живеат околу 8.000 лица од турска националност, но и во Скопје, Штип и Битола. Државната агенција на Турција во оваа општина веќе инвестира во изградба на водовод, атмосферска канализација, инфраструктура и во проектот ‘чиста вода’.
Далеку посериозно е влијанието на Турција во Македонија преку образовниот процес. Како што е познато, колеџот ‘Јахја Кемал’ веќе осум години успешно функционира во државава, а свои школи има во скопската населба Бутел, во Струга и во Боговиње, места каде има турско малцинство или муслимани. Низ образовниот процес, домицилното население го изучува турскиот јазик, културата, обичаите итн., се создава класа луѓе кои преку турските или преку партиите на муслиманите во Македонија подоцна би влегле во политиката.
Премногу индикативно е и стационирањето на седиштето на Интернационалниот балкански универзитет од Турција токму во Скопје и тоа на Калето. Посебно што оваа високо-школска установа, од срцето на главниот град на Македонија ги диригира дисперзираните студии во Албанија, Бугарија, Србија и останатите наши соседи. Според нашите сознанија, македонските служби веќе трагаат по турските конекции на овој универзитет со преставници од владата во Анкара, со нивните финансиери и со неизбежната невладина организација ИХХ. Се бараат конекциите на извесен Метин Челил во Турција, но и, занимливо, на Бехуџидин Шехаби, директорот на Националниот конзерваторски центар во Скопје, кој е во бордот на претставници на турската фондација на универзитетот, а преку центарот е и предводник на реставрацијата на голем број џамии во Македонија.
Турција вложила пет милијарди евра на Балканот
Угледното интернет-издание за анализа на светските текови ‘Балкан инсајт’, неодамна излезе со интересен текст, поврзан со влијанието, вложувањата и намерите на Турција на Балканот. Во текстот насловен како ‘Турскиот шопинг на Балканот’, најпрво е наведено дека инвестирањето на Анкара во стратешки цели на Балканскиот полуостров има за цел да го зголеми своето економско и политичко влијание, притоа наведувајќи го менито што се наоѓа на турската листа.
Според она што се наведува во текстот, целата приказна започнува уште во 2001 година, кога тогашниот министер за надворешни работи на Турција, Ахмет Давутоглу, ги обелодени стратегиските интереси и глобалните амбиции на Анкара.
- Секој што се сомнева во таквите амбиции, најпрво треба да ја земе предвид геополитичката положба на Турција во светот. Турција е и европска и азиска. Се наоѓа и на Балканот и на Кавказ, но и на Блискиот Исток и е медитеранска земја - ќе порача првиот турски дипломат пред десет години.
Денес, според податоците на Светската банка, Турција е 17-та по големина економија на светот со бруто-домашен производ (БДП) од 617 милијарди американски долари!
- Турција е дефинитивно заинтересирана да инвестира во стратешките сектори на Балканот, како што се телекомуникациите и аеродромите. Ова е дел од нивната економска стратегија, со цел да доминираат во клучните економски сектори во овој дел од Европа - вели Фади Хакура, експерт за пристапување во ЕУ на Турција и член на лондонскиот тинк-тенк ‘Четам Хаус’. Исто така, минатата година, турско-американскиот конзорциум ‘Енка и Бехтел’ доби тендер вреден околу 700 милиони евра за изградба на нов автопат што ќе ги поврзува Косово со Албанија и Србија.
Сепак, клучното прашање е дали турското влијание го оддалечува Балканот, т.е. Србија, Босна, Македонија и Косово од Европската унија? Општо мислење е дека, с` додека официјална Анкара како клучна цел го има зачленувањето во ЕУ, тогаш ниту една земја што е нејзина економска цел не треба да се чувствува загрозена во тој поглед.
Официјалните податоци на турскиот Завод за статистика велат дека главните инвестиции на Турција се на Блискиот Исток, со оглед на тоа што вкупната трговија со земјите од овој регион изнесува 23,4 милијарди евра. Вкупниот извоз на Турците во балканските земји (Грција, Романија, Бугарија, Албанија, Македонија, Србија, Хрватска, Босна, Црна Гора и Косово) е проценет на околу пет милијарди евра за минатата година. Додека некои тврдат дека интересот на Турција на Балканот го одразува обидот на Анкара да создаде алтернатива на членството во ЕУ, други веруваат дека Турција само ги гради своите постојни врски со регионот.
Според експертите со кои разговаравме, Македонија е коридор од стратешко значење на Балканот, па и во Југоисточна Европа, а интересот на Турција е токму воспоставување коридор и граница кон Европската унија. Доколку успее планот на министерот за надворешни рбаоти Ахмет Давутоглу, ништо не би ја спречило Турција и да си формира своја евроазиска унија, налик на ЕУ, за што говорат фактите за економската и стратешка соработка на Турција со Централна Азија и Блискиот Исток. Затоа Турција пенетрира во Либан, со цел да го оствари стратешкиот договор со Сирија, а тоа е намалување и постепено истиснување на иранското влијание во Либан и Ирак. Во извештајот објавен од страна на Европскиот институт за стабилно, независно и непрофитно истражување, во ноември минатата година, споредени се односите меѓу Турција и ЕУ, како еден вид католички брак, т.е. дека разводот не е опција. Авторите на извештајот предвидуваат дека дури доколку Турција и не ~ се приклучи на Унијата во наредните десет години, процесот на пристапување ќе биде во тек. Само прашање е дали тогаш двојката ќе биде среќна. Колку што ќе биде сигурно инкорпорирањето или подготвувањето за припојување на балканските земји кон ЕУ, толку ќе биде сигурно и обновувањето на односите меѓу Турција и нејзините поранешни Отомански територии.
Бобан НОНКОВИЌ
