Русија ќе гради шест носачи на авиони
Од новите материјали ќе биде направена и новата руска ракета-носач „ангара“
Од нашиот дописник
Бранко Влаховиќ
МОСКВА - Во составот на Северната и Тихоокеанската руска флота во блиска иднина би требале да се појават шест модерни носачи на авиони. Адмиралот Владимир Висоцки, командант на руската воена флота, тврди дека тоа нема да бидат обични носачи на авиони туку „морски авионосни системи“, Висоцки објаснува дека изградбата на тие модерни „авионосни системи“ ќе почне во 2012 година и дека тие во многу нешта ќе се разликуваат од сегашните носачи на авиони.
Новите „авионосни системи“, или како што Русите ги нарекоа МАС, ќе бидат во тесна врска со руските вселенски единици, како и со авијацијата и системите за противвоздушна одбрана.
Рускиот премиер Владимир Путин вчера изјави дека е направена нова федерална програма, која ќе овозможи овдешната индустрија да произведува модерни материјали што ќе се користат за правење нови типови авиони, ракети, подморници и бродови. Во понеделникот Путин ја посети московската фабрика „Авангард“, која се занимава со производство на машини и која се наоѓа во огромниот систем „Алмаз Антеј“, кој произведува современи руски ракетни системи.
Владислав Мењшиков, директорот на концернот „Алмаз Антеј“, во разговор со Путин рече дека досега голем проблем бил тоа што не се вложувани средства за правење нови материјали од кои, меѓу другото, зависи и тоа дали противничките радари ќе можат навремено да забележат или не некоја ракета.
Руската влада до 2015 година ќе вложи повеќе од 60 милијарди рубли (1 евро=36,5 рубли) за развој на производството на стратегиски материјали. Тие материјали, освен во воената индустрија, ќе се користат и во друго производство. Ќе се изградат околу 200 современи хемиски и металуршки фабрики, кои би требале да произведуваат повеќе од илјада различни нови материјали и технологии.
Во времето на СССР, Советите одеа во чекор со Америка, што се однесува до правењето нови материјали. Денес Русија купува околу 300 вида материјали што ги користи во својата индустрија. Јасно е дека оние поновите видови материјали произведувачите од Запад не сакаат да и ги продаваат на Русија.
За нови материјали се посебно заинтересирани произведувачите на авиони. Така во рускиот авион од петата генерација ќе се вградува многу „тврда пластика“ наместо алуминиум. Композитни материјали се' повеќе ќе се вградуваат и во патничките авиони. Во производството на американскиот „боинг“ од сите материјали што се вградуваат во него околу 60 отсто се композитни, разна тврда пластика и каучук. На тој начин се намалува тежината на леталото, па со тоа автоматски се троши помалку гориво. Од новите материјали ќе биде направена и новата руска ракета-носач „ангара“.
Разбирливо е тоа што Русите засега не сакаат да ги откриваат своите тајни и да објаснуваат кои материјали имаат намера да ги произведуваат. Во иднина, Русите ќе го прават телото на својата ракета од т.н. панвлакна кои се поцврсти од метал, но забележително полесни. Од тој материјал може да се направи и телото на подморница, што не ќе можат да ја откријат подводните радари.