Еве извадок од утрински весник
Учениците и директорите изненадени, само Бирото за образование задоволно.
Освен Бирото за развој на образованието, сите други се незадоволни од матурата. Родителите, поради послабиот успех што го покажале децата на матурата и високите суми за приговори. Учениците се сомневаат во критериумите за оценување, додека директорите на училиштата се засрамени поради оценките на нивните ученици и се прашуваат каде е пропустот.
Надлежните од Министерството за образование задоволно ги тријат рацете, откако сфатија дека ќе немаат многу работа со приговорите на средношколците кои полагаат државна матура. На вчерашниот прв ден од рокот предвиден за приговори, кој ќе трае и денеска, на прсти можеа да се избројат поднесените приговори во училиштата за двата предмета од државната матура. Впечатокот по вчерашниот прв ден, кој беше оставен како рок за поднесување приговори (заедно со денешниот ден), покажа дека учениците се премислуваат да поднесуваат приговори, пред се', поради високите суми за приговори, кои изнесуваат 2.000 денари од испит.
Во средното скопско училиште „Никола Карев“ вчера беа поднесени само четири приговори за двата екстерни испита, од кои три за македонски и еден за математика. Во ова училиште очекуваат оваа бројка да се искачи најмногу до пет приговори, иако бројот на учениците кои полагаа матура е 247.
„Децата не покажаа добри резултати на матурата. Не може во текот на учебната година да имаат висок просек и да добиваат петки, а сега со матурата нивниот успех да се сведе на двојки, тројки и четворки.
Најнезадоволна сум од резултатите по македонски јазик“, разочарана е директорката на средното „Никола Карев“, Горица Илиоска.
Според неа, треба да се направи анализа што е причина за послабиот резултат на учениците во споредба со успехот што го постигнуваат во текот на учебната година. „Треба преку анализа да се види дали соодветствува наставната програма, дали проблемот е во наставниците, или пак, во тоа што децата не учат“, вели Илиоска.
Родителите велат дека државата им става сопка со тоа што поставуваат високи суми за поднесување приговори. Така, ако нивните деца мислат дека се погрешно оценети во тестот и сакаат да поднесат приговор, треба веднаш да уплатат 2.000 денари од испит. Овие пари ќе им бидат вратени само ако се докаже дека биле во право.
„Тоа е само начин да се соберат пари. Од каде да знам каде сум згрешила, па да поднесам приговор кога ми се скратува правото да го видам сопствениот тест. Тоа ми остава простор за сомневање како се оценувани тестовите“, вели една средношколка.
Нејзина соученичка раскажува дека постоеле многу строги критериуми за тестот по македонски јазик поради поените.
„Една од моите другарки беше оценета со 94,3 и доби четворка, додека друга доби 95,1 и има петка. Дали тоа значи дека од 95 до 100 поени е петка? Тоа се премногу строги услови со кои се селектираат матурантите, бидејќи за еден или два поена може да го изгубат местото на факултетите“, вели друга матурантка. За неа е посебно проблематично како се оценувани есеите во тестот по македонски јазик, каде што се остава простор да дојде до израз размислувањето на ученикот.
