ВО МАКЕДОНИЈА НЕМА ПТИЧЈИ ГРИП - КОКОШКАТА ОД МОГИЛА УГИНАЛА ОД „ЊУКАСЛ“
Конечните резултати од анализата на сомнителната мостра од Могила извршена во референтната лабораторија Вејбриџ во Лондон покажале дека во Македонија нема птичји грип, соопшти денеска директорот на Ветеринарната управа Слободен Чокревски.
Кокошката од Могила, според наодите направени во Македонија, угинала од атипична чума "Њукасл".
"Испитувањата на сите мостри што ги испративме во Лондон дадоа негативни резултати и сега можеме со сигурност да кажеме дека во Република Македонија до овој момент нема присуство на птичји грип", изјави Чокревски.
Истакнувајќи дека опасноста од миграторните птици и пренесувањето не е поминато рече дека ветеринарните власти остануваат будни и ќе продолжат да спроведуваат мониторинг и следење на теренот.
"Присуството на вирусот во Романија и во Хрватска не ни дава простор да бидеме релаксирани да не ги спроведуваме сите мерки на претпазливост", рече Чокревски и додаде дека никој не може со сигурност да тврди дали утре нема да слета некоја преселна птица и во Македонија да пренесе птичји грип.
Тој најавува дека мониторингот ќе продолжи и кај домашната живина и кај птиците преселници.
Мониторингот на дивите птици ќе почне од идната недела откако ќе стигнат новите китови за дијагностика. Составени се работни групи кои ќе одат на десетте локалите одредени од експертите каде може да пристигнат диви птици од подрачјате каде го има вирусот, а за дијагностикумите се потребни три милиони денари.
Тој информира дека од пријавените помори на птици во селата се прегледани 163 мртви птици од кои е утврдено дека 118 угинале од њукаселска болест, а 34 биле со друга етиологија. Вакцинацијата против њукаселската болест продожлува на терен, а за обештетувањето на домаќинствата од Могила, Чокревски рече дека документацијата е подготвена и дека треба да се потпишат од оштетените.
Чокревси соопшти дека сите меѓународни институции се информирани дека во Македонија нема птичји грип и оти веќе реагирале од Србија и Црна Гора која ќе престане со спроведување на мерките за дезинфекција при влез во земјата.
За да им се помогне на живинарите со кризата настаната со прекинот на извозот, директорот на Ветеринарната управа најави дека следната недела ќе одржат состанок заедно со ресорниот министер на која ќе им бидат укажани можностите за надминување на проблемот.
"Ќе направиме напори да се воспостави извозот и да се надмине кризата", изјави Чокревски и додаде дека земјите каде што сме извезувале како Косово, БиХ и Хрватска се информирани за тоа, но оти забраната за увоз ќе зависи од нивната проценка со оглед на тоа што вирусот го има во соседството.