Уште пет сезони на Стемфорд Бриџ - Џон ТериТери потпиша нов договор
Џон Тери, конечно, стави крај на сите шпекулации за својата иднина потпишувајќи нов петгодишен договор со екипата на Челзи.
Цели шест месеци траеја преговорите меѓу агентот на Тери и клупските директори на “сините”, за на крајот да биде договорено капитенот на Челзи во следните пет сезони да има неделна плата од 135.000 фунти. Со ова Тери стана најплатениот фудбалер во Англија надминувајќи ги на оваа ранг-листа своите соиграчи Михаел Балак и Андриј Шевченко, кои од Роман Абрамович неделно добиваат по 130.000 фунти.
“Се надевам дека навивачите гледаат дека се обидуваме да создадеме нешто сосема специјално тука. Јас сум член на Челзи во текот на целата своја кариера, дури ја добив и привилегијата да станам капитен на овој фантастичен тим, и токму затоа во ниту еден момент не размислував за заминување од Стемфорд Бриџ. Пресреќен сум што успеавме да најдеме заеднички јазик, и што уште долго ќе бидам предводник на Челзи”, изјави 26-годишниот Тери.
Задоволни од постигнатиот договор беа и челниците на “сините”.
“Ова е многу важен ден за нашиот клуб. Како капитен Џон е не само голем фудбалер туку и симбол на Челзи, и презадоволни сме што успеавме да најдеме заеднички јазик во преговорите со него. Со игрите што ги прикажува тој апсолутно заслужува да биде најплатен фудбалер во Англија”, истакна извршниот директор Питер Кенјон.
Според неофицијалните информации од Островот, челниците на Челзи во следните неколку дена ќе ги интензивираат и преговорите со Френк Лампард за потпишување долгогодишен договор со овој фудбалер.