СДСМ не само што се реформира, туку и го смени и хард дискот на партијата. Она што Црвенковски го вети, и го оствари, радикално го смени партиското раководство.
Се се млади, образовани луѓе, и како што велат, свежа крв. Со ова, велат во СДСМ, ги демантираат шпекулациите на владејачката партија дека немаат свои кадри.
„Можам слободно да кажам дека сите оние оценки и впечатоци што нашите политички противници се обидоа да го наметнат во изминатиот период во јавноста, паднаа во вода, со еден збор - медениот месец на Никола Груевски и ВМРО-ДПМНЕ заврши“, изјави Емилијан Станковиќ, член на Извршниот одбор на партијата.
Инаку, ако Зоран Заев беше добитна комбинација, двајцата потпретседатели се изненадување, тоа се Гордан Георгиев и Зоран Јовановски, кои доаѓаат од Форум центарот за истражување и од „Комерцијална банка“.
На брифингот за новинарите Емилијан Станковиќ истакна дека дека во Централниот одбор веќе ги нема истакнатите партиски членови Владо Бучковски, Радмила Шеќеринска, Никола Поповски, Горан Минчев, Ѓорѓи Спасов, Никола Ќуркчиев, Благој Ханџиски, Илинка Митрева, Димитар Бузлески, Илија Илоски, Горан Зечевиќ, градоначалниците на Охрид и Куманово, Александар Петрески и Зоран Дамјаноски.
Покрај Станковиќ, во ЦО на партијата од актуелните високи партиски членови влегоа и доскорешниот в.д. лидер на партијата Зоран Заев, Игор Ивановски, Јани Макрадули, Љубомир Јанев и Андреј Петров, а меѓу избраните е и Наташа Савова, соработник на лидерот Црвенковски од периодот кога тој ја извршуваше претседателската функција.
Веднаш по изборот на новите членови Централниот одбор на СДСМ одржа конститутивна на која за секретар на партијата е избран Андреј Петров, а за потпретседатели Гордан Георгиев, Зоран Заев и Зоран Јовановски.
Избрани се и 17 членови на Извршниот одбор на партијата - Дане Талевски, Драган Тевдовски, Наташа Савова, Виктор Димовски, Игор Ивановски, Емилијан Станковиќ, Магдалена Несторовска, Јово Деспотоски, Јани Макрадули, Рената Дескоска, Људмил Спасов, Пецо Стојановски, Орце Јордановски, Виктор Цветкоски, Марија Костова, Наташа Петровска и Митре Велјаноски.
10-тиот Конгрес на опозициската СДСМ ќе остане запаметен според драконската кадровска метла, но и по експресниот тек - за еден час, без дискусии, се комплетира новото раководство.
А1.
