Уште еден... од 100-те чекори...
за растурање на Македонија.
За три месеци над 1.000 лица во Битола останаа без работа
По „Бетон“, беше ликвидирана и Битолска пиварница - вработените без плата и придонеси за седум години
Битола - Над 1.000 битолски семејства последните три месеци останаа без егзистенција. Една од најголемите градежни фирми во градот - „Бетон“ пред три месеци беше ликвидирана, а истата судбина деновиве ја снајде и Битолска пиварница. И во двата случаја работниците не само што останаа без работа, останаа и без плати и придонеси за последните седум години. Побаруваат милионски суми евра, а нивната ситуација е дополнително отежната, бидејќи најголемиот дел од работниците се во поодминати години и со намалена работоспособност, без реални шанси за ново вработување. Битолските стопанственици поради се' помалите шанси за вработувања стравуваат од миграција на младите битолчани.
„Државата наместо да отвара фабрики, гласаше против рестартирање на фабриката. На улица останаа 120 редовно вработени и уште толку сезонци. Најлошо е што сите ние сме луѓе во години и се плашиме дека некој ќе не' прими на работа. А ако фабриката се рестартираше, газдата се обврза стотина од нас да земе на неопределено време“, реагира Цветан Петровски синдикалец во Битолска пиварница. За оваа фабрика минатата недела судот одлучи да се ликвидира, бидејќи најголемиот доверител УЈП не се согласи со програмата на турските газди за рестартирање на пиварницата.
Со ликвидацијата на градежната фирма „Бетон“ 700 битолски градежници останаа на улица, а поголемиот дел од нив се без право на пензија. „Одлуката за ликвидација на нашата фирма не' остава само со парите за трите последни плати и придонесите за тие месеци, додека стажот за последните седум години не ни е регулиран. Иако сме работеле и сме ја граделе оваа фирма, сега никој од нас нема право на пензија. Ете тоа е најголемата наша мака“, вели Целе Михајловски од Одборот на доверители на „Бетон“.
Од Регионалната стопанска комора во Битола сметаат дека ликвидациите на „Бетон“ и на Пиварницата негативно ќе се одразат врз економската состојба во градот и драстично ќе влијаат на миграцијата на младата популација. „На Битола и' се потребни нови производствени капацитети, ако тие не се изградат во наредните четири години ќе заостануваме во развојот и во стандардот, а ќе одиме напред во преселба на младите, кои ќе бидат принудени да си го бараат чарето на друго место“, вели Благој Стојчев, претседател на Регионалната стопанска комора во Битола.
Ваквата економска слика на градот, според битолските стопанственици, дополнително ќе биде отежната и поради светската економска криза. Иако малку битолски капацитети можат да се споредуваат со светските брендови, сепак, се очекува не само градежништвото туку да настрадаат и текстилната индустрија и транспортот. Во Битола со овие дејности се занимаваат над 25 фирми со неколку илјади работници.
Градот под Пелистер и натаму е меѓу првите во државата според бројот на невработените. Заклучно до Нова година, во Агенцијата за вработување се евидентирани 18.980 невработени битолчани. Од нив, околу 2.000 се постари од 45 години, возраст со која работодавците потешко се одлучуваат да ангажираат работници. (А.Б.)
