Поради навреди, клевети и јавни закани по гостувањето во Јади бурек:
По избори - на СУД!
Драган Павловиќ Латас ги тужи ЗНМ, поранешниот портпарол на Владата на СДСМ и сегашен шеф на Штабот на Фрчковски, како и Никола Гелевски од Утрински весник
По завчерашното гостување на Драган Павловиќ-Латас во емисијата Јади бурек на Јанко Илковски, со селективни и тендециозни реакции се јавија Здружението на новинари на Македонија, поранешниот портпарол на Владата на СДСМ Ѓунер Исмаил, а ден пред настапот, Никола Гелевски во Утрински јавно се закани и ги навреди токму Латас и Јанко Илковски.
Затоа, Драган Павловиќ-Латас ги тужи ЗНМ, поранешниот портпарол на Владата на СДСМ и сегашен шеф на Штабот на Фрчковски, како и Никола Гелевски од Утрински весник.
1. ЗНМ односно Советот на честа, во кој членува заменик-главниот и одговорен уредник на Дневник, Бранко Ѓорѓевски, кој со соопштението на ЗНМ го брани главниот и одговорен на Дневник Сашо Кокаланов и со тоа цени дека Латас во емисијата Јади бурек кај Јанко Илковски имал, цитирам: говор на омраза. Само Суд има право да осудува во постапка и да цени основ за вакво дело, а не здружение на граѓани, во случајов Здружение на новинари на Македонија.
Освен тоа, ЗНМ и Бранко Ѓорѓевски го наведуваат Латас како новинар кој дал таква изјава. Притоа, да потсетиме, дека Латас не е член на ЗНМ и во емисијата гостуваше како приватно лице.
2. Ѓунер Исмаил е даден на Суд за клевета зошто изјавил дека еден новинар во емисија на локална ТВ му се заканил нему и на неговиот претседателски кандидат, поврзувајки го тој новинар со поделбата на Босна и Херцеговина и Косово и палењето на амбасадата на САД. Бидејќи на екс портпаролот на Владата на СДСМ не му е прв пат да дава вакви произволни клевети, даден е на Суд истите да ги докаже.
3. Никола Гелевски, во коментарот во Утрински весник е даден на Суд заради закана и навреда. Тој во текстот насловен како: Мегафоните од фиреровиот сокак, најпрво прави поврзување со нацизмот што претставува навреда, а со реченицата дека, цитирам: Мечката на насилството ќе заигра и пред портите на поттикнувачите од типот на Латас, Бичиклиски и Јади бурек, упати јавна закана.
Воедно, ЗНМ не се огласи дека ова е закана на Гелевски со говор на омраза, туку како и секогаш досега, за нивните функционери ЗНМ замижува пред текстовите на своите пријатели, а осудуваат текстови на неистомисленици.
Иако неколку пати во емисијата беше кажано дека Латас не е новинар на новинарска задача, туку граѓанин како и секој друг гостин, за ЗНМ тоа не е важно, туку е поважно како функционерот на ЗНМ Бранко Ѓорѓевски да му биде повеќе на услуга на својот главен уредник Сашо Кокаланов и директорот на Дневник Срѓан Керим.