можда мал оф топик, али треба да се искаже почит:
Почина Баки Малиќи – тренерот со најдолг стаж во еден клуб кај нас!
Објавено:
4 ноември, 2014 14:51 часот
Харизматичниот тренер својата кошаркарска кариера ја мина само во еден клуб, чаирска Слога, каде што работеше речиси без престан во периодот од 1973 до 2000 година.
Малиќи (стои десно) со една од најуспешните генерации на Слога
Македонската кошарка остана без Баки Малиќи, еден од своите пионери и тренер со дефинитивно најдолг стаж во еден клуб, кој по кусо боледување почина денеска на 72-годишна возраст.
Малиќи својата кошаркарска кариера како тренер ја мина само во еден клуб, чаирска Слога, каде што работеше цели 27 години. Почна во 1973 година, а се повлече на почетокот од 21 век. Под негово раководство, екипата од Чаир четири пати беше првак на Македонската лига, а две години настапуваше во исклучително силната Прва Б-лига во времето на СФР Југославија.
Станува збор за една од легендите на скопската кошарка од нејзиното најромантично време, харизматичен тренер низ чии раце минале голем број квалитетни играчи, кои подоцна се покажале на големата сцена. Малиќи беше еден од првите тренери и на сега еминентниот европски стратег, Октај Махмути, кој голем дел од својата играчка кариера мина токму во редовите на Слога.
Погребот на починатиот тренер ќе биде извршен утре.