KАРОЛИНА СО ПЕСНА ВО БОРБА ПРОТИВ РАКОТ
Под мотото „Го почнувам животот од почеток“ балканските жени ќе се борат против ракот на матката. Кампањата која во месец јануари ќе ја реализираат во регионот, има за цел да на модерен и современ начин испрати порака до сите жени, да им даде сила и да им каже дека ракот не бира.
Во рамките на оваа кампања е и најновата песна на Маја Сар, отпеана од незаменливите балкански вокали, Нина Бадриќ, Александра Радовиќ и Каролина Гочева. Песната ќе биде регионална химна и ќе има за цел да пренесе ведра и позитивна порака. Спотот за песната, ќе имате можност да го погледнете утре, ексклузивно во Бекстејџ во 18.40.
Автор на песната е Маја Сар која вели дека доколку заинтригираат и само една жена или девојка, тогаш ја постигнале целта. За останатите три балкански диви, Нина, Kаролина и Александра, учеството во овој регионален проект претставува огромна чест и задоволство. Спотот за песната насловена како „Мој је живот моја песма“ освен во Македонија, утре премиерно, во исто време ќе биде прикажан уште во неколку балкански земји.